ICY : Sugar Free Ice Cream

Mind-blowing - 26

Lockscreenကို Screenshot ရိုက်ထားတဲ့ ဓာတ်ပုံကို Messengerကနေ ပို့လာသည်။ လူကို လှမ်းကြည့်လိုက်တော့ ခြံစောင့်ဦးလေးနဲ့ စကားပြောမပျက်။

နောက်ကျောပြင်ကို မျက်စောင်းထိုးလိုက်ပြီး နဂါးမောက်သီးသာ စားနေလိုက်သည်။

ခြံထဲမှာ သီးနှံစားပင်တွေ စုံလင်လှသည်။ ပိန္နဲပင်၊ သင်္ဘောပင်၊ နဂါးမောက်၊ သံပရာ၊ ကော်ဖီ၊ တညင်း၊ ပူစီနံ အစရှိသဖြင့် အစုံအလင်နဲ့ ပန်းပင်အချို့လည်း ရှိသည်။

မိန်းကလေးတွေက တစ်ခြံလုံး သူတို့ခြေရာထပ်အောင် စူးစမ်းလေ့လာနေကြပြီး တစ်ယောက်တစ်လှည့် ဓာတ်ပုံရိုက်နေကြသလို ယောက်ျားလေးတွေကလည်း ကွပ်ပျစ်ပေါ်ထိုင်ရင်း၊ ဘောလုံးအကြောင်း၊ ကားအကြောင်းပြောနေကြ၏။

တိတ်ဆိတ်ငြိမ်သက်နေတဲ့ ခြံဝန်းထဲမှာ အာဘောင်အာရင်းသန်သန်၊ ကျယ်ကျယ်လောင်လောင်နဲ့ စကားပြောနေကြတာ ခေါင်းတွေပါကိုက်လာရသည်။

ကိုကိုကတော့ ခြံစောင့်ဦးလေးနဲ့ စကားပြောနေပြီး ခြံအတွက် ဘာလိုအပ်လဲ မေးမြန်းနေ၏။

နှစ်ယောက်ထဲ ရှိနေချိန်မှာ ပြောင်ချော်ချော်နဲ့ ဘာကောင်လေးမှန်းမသိ​ပေမဲ့ အခုလိုကြတော့လည်း အရွယ်နဲ့မလိုက်တဲ့ ရင့်ကျက်မှုကို မြင်တွေ့နေရသည်။

ဟွန်း... ဒါကို ဓာတ်ပုံပို့လာပြီး စဖြစ်အောင် စလိုက်သေးတာ။

ဦးလေးနဲ့ စကားပြောနေရင်း ဖျတ်ခနဲ လှည့်ကြည့်လာတာကြောင့် ရှောင်ချိန်မရလိုက်ပဲ ကြည့်နေတာ လူမိသွား၏။

ရှက်တော့မရှက်ပါဘူး။ မျက်နှာပူသွားတယ်။ နောက်ပြီးတော့ ရင်ခုန်သံတွေ ဆူညံသွားရတယ်။