ICY : Sugar Free Ice Cream

Fiction - 29

နေသိပ်မကောင်းဘူးဆိုတဲ့ အကြောင်းပြချက်နဲ့ Video Callခေါ်တာကို ငြင်းဆန်လိုက်သော်လည်း ကိုကိုက လက်မခံပါ။ မျက်နှာကို သေချာစေ့စေ့စပ်စပ်ကြည့်လာပြီး ဘယ်လိုနေမကောင်းတာလဲ မေးလာ၏။

နေမကောင်းဘူးဆိုတာက စိတ်ဖိစီးမှုများပြီး Periodမမှန်ခြင်း။ အသေးအဖွဲ့ထင်ထားပေမဲ့ အားနည်းနေချိန်မှာမှ အဖျားဝင်ပြီး သေလုမျောပါး ဝေဒနာခံစားလိုက်ရသည်။

စိတ်ဖိစီးမှုများတယ်ဆိုတာကလည်း အလုပ်မှာ အဆင်မပြေဖြစ်တာပင်။ ဘယ်လိုအဆင်မပြေတာလည်းဆိုတော့ စိတ်ထဲမှာ ပြောဆိုနေလဲ၊ လက်တွေ့မှာတော့ ပြုံးပြုံးလေးနဲ့ ဟုတ်ကဲ့ပဲ ပြောလိုက်ရခြင်းတွေကြောင့်ပေါ့။ 

ရောဂါ‌အကြောင်း ကိုကို့ကိုတော့ အသေးစိတ်မပြောပြပေမဲ့ ပြောပြလည်း သူက သိနေ၏။

သူ့ကိုယ်သူလည်း ဆရာဝန် မဖြစ်ချင်လို့ စာစီစာကုံးကို တမင်တကာ နှစ်မျက်နှာပဲ ရေးခဲ့တာလည်း ပြောရင်း စနောက်တတ်သေးသည်။

အိပ်ရာပေါ်မှာ မှောက်အိပ်ရင်း ကိုကိုနဲ့ Video Callပြောနေတာဖြစ်ပြီး ကိုကိုက ခုတင်ပေါ်မှာ ရှုပ်ပွပြန့်ကျဲနေတဲ့ ပစ္စည်းတွေကို ရှင်းလင်းရေးလုပ်နေရင်း စကားပြောနေသည်။

ရှင်းလင်းပြီးရင် ခရီးထွက်ဖို့အတွက် အဝတ်အစားထည့်ရမည်ဖြစ်သည်။

" ဒီဇင်ဘာရောက်တော့မယ်မလား.. ဘာနေနေကွာ.. စာမေးပွဲဖြေဖို့ ဘယ်လောက်မှ မလိုတော့ဘူး.. ဒါကို အခုထိ ကဗျာခုနစ်ပုဒ်ကိုမရသေးဘူးတဲ့.. အဲ့ကောင်နဲ့ စိတ်ဖိစီးရလွန်းလို့ ရောဂါရတော့မှာပဲ... "

" မရပါနဲ့.. အတူတူပဲ.. ကဗျာခုနစ်ပုဒ်မှာ.. Bridgesတစ်ပုဒ်ပဲ ကောင်းကောင်းရတာ... "