ICY : Sugar Free Ice Cream

Thank You - 33

Domino Effectက ဘယ်နေ့ကစတင်ခဲ့လဲဆိုရင် Boxing Dayနေ့ကတည်းက စတင်ခဲ့သည်။

စက်မှုထဲက ဘုဏ်းသန့်အိမ်မှာ ဘောလုံးပွဲကြည့်မယ်၊ အဲ့အိမ်မှာပဲ New Yearအထိနေမယ် ပြောလာသည်။ တားမြစ်စရာအကြောင်းမရှိ။ သူ့အခွင့်အရေး၊ သူ့လွတ်လပ်ပိုင်ခွင့်ပဲလေ။

ဒါပေမဲ့ စက်မှုထဲမှာနေမယ်၊ မြို့ထဲကို ပြန်မလာဘူးဆိုသူက Boxing Dayနေ့၊ ညနေခင်းမှာ မြို့ထဲက စားသောက်ဆိုင်တစ်ခုမှာ ရောက်နေသည်။

ဖုန်းဆက်ဖို့အချိန်မရလိုက်တာလည်း ဖြစ်ရင်ဖြစ်မှာပေါ့ဆိုပြီး လျော့ပေါ့တွေးခဲ့ပေမဲ့ မတွေးပေးနိုင်လောက်တဲ့ အကြောင်းအရင်းက ထပ်ပေါ်လာ၏။

ကျောင်းတုန်းက သူ့ကိုမှ မရရင် ဒီတစ်သက်ယောက်ျားမယူတော့မယ့် မိန်းမတစ်သိုက်နဲ့ New Year Party ဆင်နွှဲနေတာကို ဘယ်လိုများနားလည်ပေးရမှာပဲ။

ရတီက နင့်ကိုကိုပါတယ်ဟဲ့ဆိုပြိီး ပွင့်ဖြူရဲ့storyကို လာပြတာကိုပင် မယုံနိုင်ဖြစ်ရသည်။

မချစ်တော့လို့ အပြစ်မြင်နေတာမဟုတ်ဘူး၊ သူ့လုပ်ရက်တွေ မဟုတ်လို့ ဖြစ်နေရတာ။

သူ Englandမသွားခင်အချိန်အတွင်းမှာ တစ်ယောက်နဲ့တစ်ယောက် နားလည်မှုတွေခိုင်မြဲအောင် ကြိုးစားရမှာမဟုတ်ဘူးလား။ ဒီလိုပုံစံနဲ့ဆို ဟိုရောက်သွားရင်လည်း ဘယ်လောက်သံသယတွေ များပြားနေရမှာလဲ။

ပူလောင်နေရတဲ့ စိတ်ကို မီးစာထပ်ထည့်ပေးသူက ကိုကိုကိုယ်တိုင်သာ။ စနေနေ့ညနေခင်းကို ဆယ့်ငါးမိနစ်နောက်ကျမယ်ဖုန်းဆက်လာသည်။

မကြည်နေတာကြောင့် နောက်ကျမယ့်အတူတူ နောက်ရက်မှတွေ့ဖို့ပြောလိုက်ပြီး ရတီ့အိမ်ကိုသာ ရောက်ခဲ့ရတော့သည်။