ICY : Sugar Free Ice Cream

Extra - 12

စနေနေ့နေ့လယ်ခင်းမှာမှ ဘောလုံးပွဲစတင်မည်ဖြစ်သော်လည်း သူမတို့အိမ်မှာတော့ သောကြာနေ့ညနေခင်းကတည်းက ပွဲစတင်ကန်နေပြီဖြစ်သည်။

ကိုဥက္ကာရဲ့ YouTube Channelအတွက် ရိုက်ကူးရေးလုပ်နေကြတာဖြစ်ပြီး ညစာစားဖို့ပင် အချိန်မပေးနိုင်ကြပါ။ ထမင်းစားဖို့ပြောရတာ ပြောရတဲ့သူကသာမောပြီး စိတ်တိုလာရတဲ့အထိ။

Videoတိုင်းမှာ ကိုဘုဏ်းသန့်က ပင်တိုင်ဧည့်သည်ဖြစ်ပြီး ကိုကိုကတော့ သူ့အသင်းရဲ့ Big Matchesတွေမှသာ ပါဝင်လေ့ရှိသည်။

ဒီတစ်ပတ်အတွက် အထူးစပယ်ရှယ်ဧည့်သည်လည်းရှိ၏။ သူကတော့ နှစ်ခါစဥ်းစားစရာမလိုတဲ့ မေမေချစ်တဲ့မေမေ့ရဲ့သားကြီးသာဖြစ်လေသည်။

သူ့မှာ ဒီအခွင့်အရေးကို မျှော်လင့်စောင့်စားနေခဲ့ရတာ Channelစပြီး တည်ထောင်စဥ်ကတည်းကဆိုတော့လည်း... Dreams Come Trueသွားတာပေါ့လေ။

စနေနေ့နေ့လယ်ခင်း၊ ဘောလုံးပွဲကြည့်ပြီးအပြန်မှာလည်း သူတို့မှာမအားလပ်နိုင်ပေ။

Stadiumမှာ ဘောလုံးပွဲကြည့်ဖြစ်တဲ့ ညနေခင်းတိုင်းမှာ အိမ်ကိုဖြောင့်ဖြောင့်တန်းတန်းမပြန်ပဲ Barသို့ သွားကိုသွားရမည်ဟူ၍ သန္နိဋ္ဌာန်ချထားကြပုံပေါ်၏။

ဘောလုံးရာသီအသစ်စတင်သည့်နေ့မှာလည်း အပေါင်းအသင်းအသစ်ကိုပါ တစ်ပါတည်းခေါ်ဆောင်ကာ မပျက်မကွက် ချီတက်ကြပြန်သည်။

အိမ်ပြန်ရောက်ရင်လည်း ရိုက်ကူးရေးလုပ်ကြဦးမည်ဖြစ်တာကြောင့် အရင်ဆုံးအိမ်ပြန်ရောက်နေတဲ့သူမကပဲ သူတို့ရဲ့studioနေရာကို သန့်ရှင်းရေးလုပ်ထားပေးပြီး ‌စားသောက်စရာအချို့ပြင်ဆင်ထားပေးလိုက်သည်။

ညရှစ်နာရီထိုးကာနီးအချိန်အထိ ထမင်းစားချင်စိတ်လည်းမရှိပဲ အိပ်ရာပေါ်မှာသာ လှဲနေမိ၏။ ဘေးနားကစင်ပေါ်မှာ တင်ထားတဲ့ ဖုန်းကိုမြင်လိုက်တော့ ချက်ချင်းပဲ စိတ်ထဲမှာမကြည်မလင် ဖြစ်သွားရသည်။