ICY : Sugar Free Ice Cream

Extra - 8

ကိုကို့ပြောစကားအရတော့ ဒီနှစ်ပိုင်းတွေမှာ အကြိုက်ဆုံးပါဆိုတဲ့ ဘောလုံးကွင်းထဲကအသံတွေအပြင် နောက်ထပ်နှစ်သက်သဘောကျရတဲ့အသံတွေလည်း ရှိလာပြီဖြစ်သည်။

ဘာတွေလဲဆိုတော့ Kitchenထဲမှာ သူမရှိနေပြီး စားသောက်စရာတွေ ချက်ပြုတ်ပြင်ဆင်နေတဲ့အချိန်မှာ ထွက်ပေါ်လာတဲ့အသံတွေကို သဘောကျပါသည်တဲ့။

အသေးစိတ်ပြောရရင်ဖြင့် Coffee Makerကအသံ၊ Toasterကအသံတို့ကအစ အိုးခွက်ပန်းကန်တို့ ထိတိုက်မိတဲ့အချိန်မှာ ထွက်ပေါ်လာတဲ့အသံတို့အဆုံး အားလုံးကို နှစ်သက်သဘောကျပါသည်တဲ့လေ။

ပုံမှန်အားဖြင့် သူမကကိုကို့ထက် အိပ်ရာစောစောနိုးလေ့ရှိသည်။ သို့သော်လည်း မနက်ခင်းလမ်းလျှောက်သွားရမည်ကို ပျင်းရိသည်ကြောင့် တချို့ရက်တွေမှာ Breakfastပြင်ဆင်နေတယ်ဆိုတဲ့အကြောင်းပြချက်နဲ့ အိမ်မှာပဲနေခဲ့လေ့ရှိ၏။

ညနေဘက်လည်းအတူတူပင်။ ကိုကိုအလုပ်ကပြန်ရောက်ချိန်မှာဆို သူမက Dinnerအတွက် ပြင်ဆင်နေပြီဖြစ်သည်။

အခုလည်း အိပ်ရာနိုးတာနဲ့ သူမရှိတဲ့နေရာရောက်လာကာ အနောက်ကနေသိုင်းဖက်ထားပြီး ပုခုံးပေါ်မေးတင်လာသည်။

" Good Morning, Baby.. ကိုယ်ဘာကူလုပ်ပေးရမလဲ... "

" ရတယ်.. မျက်နှာသစ်ခဲ့ပြီလား... "

" Track suitတောင် ဝတ်ထားပြီးပြီးကို... "

အိပ်ရာနိုးစ ခပ်အက်အက်အသံလေးကို အင်မတန်မှသဘောကျရသည်။ တကယ်တော့ စိတ်ဆိုးနေတဲ့ ခပ်မာမာအသံလေးကိုလည်း သဘောကျရတာပါပဲ။

တစ်ဦးတည်းသောညီလေးကို စကားပြောတဲ့လေသံကိုတော့ သဘောမကျ။ စိတ်ရှည်သည်းခံမှုမရှိပဲ အထက်စီးဆန်သည်ဟု ခံစားရသည်။