ICY : Sugar Free Ice Cream

Lucky - 44

Breakfastကို အိမ်အနီးအနားတစ်ဝိုက်က ‌ရှမ်းခေါက်ဆွဲဆိုင်မှာပဲ စားခဲ့ကြပြီး Blueberry Green Teaနှစ်ခွက်ဝယ်လိုက်ကာ အိမ်အပြန်လမ်းမှာ ဒီနေ့တစ်နေ့တာကို ဘယ်လိုဖြတ်သန်းကြမလဲ စဉ်းစားလိုက်သည်။

" အလုပ်က ရရဲ့လား.. စာသင်နေတာတွေကရော... "

" ရပါတယ်.. စာသင်နေတာကလဲ ဆရာမ မလာလေ ပိုကြိုက်လေပဲကို... "

" အဲ့တာဆို ကိုယ်လဲနောက်ဆံမတင်းတော့ဘူး... "

" ဟုတ်... "

ကိုကို့လက်ကို မလွှတ်တမ်းဆုပ်ကိုင်ထားရင်း တက်ကြွရွှင်လန်းစွာနဲ့ပဲ ခေါင်းညိတ်လိုက်သည်။ လျှောက်လှမ်းနေရတဲ့ ခြေလှမ်းတွေကလဲ ပေါ့ပါးသွက်လက်နေရ၏။

" ဘယ်သွားချင်သေးလဲ.. ကိုယ်က ဘယ်မှသွားစရာကိစ္စမရှိဘူး.. ဖေဖေက တောင်ကြီး.. မေမေနဲ့ငယ်လေးက အင်းလေးမှာ.. မမက သူ့အမျိုးသားနဲ့ Indiaသွားတယ်... "

" Pink Cityမှာမလား.. ဓာတ်ပုံတွေတွေ့တယ်.. မမက အရမ်းလှတာပဲ.. လှတယ်ဆိုတာထက် အေးချမ်းတယ်.. ငါ့ကိုလည်း ဂရုတစိုက်နဲ့ချစ်ပေးတယ်.. သံသာပြောတာကတော့လေ.. မမက လူတိုင်းနဲ့မခင်တတ်ဘူးတဲ့.. မမကို ညာလို့မရဘူး.. သူ့အပေါ် အပေါ်ယံလား တကယ်စိတ်ရင်းနဲ့လားဆိုတာ စကားပြောကြည့်တာနဲ့ သိတယ်တဲ့... "

" အင်း "

" ဒါပေမဲ့လေ.. မမက ကိုကို့ကိုကြောက်တဲ့ပုံပဲ.. နည်းနည်းရှိန်နေတယ်ထင်တယ်.. ကိုကိုက အဲ့လိုမလုပ်ပါနဲ့... "

" ကိုယ်က ဘာလုပ်လို့လဲ... "

" အင်းလေ ဘာမှမလုပ်လို့.. ခဏခဏဖုန်းဆက်ပေးပြီး ရင်းရင်းနှီးနှီး‌မနေလို့... "