ICY : Sugar Free Ice Cream

Apple Pie - 9

Recommended Song
All about him -Auburn

စာမေးပွဲဖြေပြီးပြီဖြစ်ပေမဲ့ Term Paperအတွက် ကျောင်း‌ကိုရောက်နေရသည်။ Term Paperကိစ္စ အောင်မြင်စွာပြီးဆုံးသွားတာနဲ့ အိမ်မပြန်ဖြစ်သေးဘဲ ကျောင်းသားရေးရာရှေ့မှာ ထိုင်ရင်းစကားပြောဖြစ်ကြသည်။

စကားပြောတာထက် လွမ်းဆွေးနေကြတယ်လို့ ပြောလို့ရမည်။ မြတ်နိုးက ကျောင်းပြီးပြီဆိုပြီး အသံတိတ်မျက်ရည်ကျနေသည်။ ရတီကတော့ ရှိုက်သံပါအောင် ငိုနေ၏။

" နင်တို့ကလည်း သူများတွေဆို နယ်ဝေးကနေ ကျောင်းလာတက်ရတာ.. ငါတို့လေးယောက်လုံး ဒီမြို့ထဲကပဲကို.. တွေ့ချင်ရင် ဖုန်းလှမ်းဆက်လိုက် အပြေးလာခဲ့မယ်... "

" ခံစားချက်တွေ မတူတော့ဘူး.. မလွတ်လပ်တော့ဘူး.. ဒီလိုကျောင်းသူဘ၀ကို ပြန်မရနိုင်တော့ဘူး.. အဟင့်... "

" မဟုတ်ဘူးလေဟာ... "

နှစ်သိမ့်ဖို့ကြိုးစားနေတဲ့ စန္ဒာ့ကို ဘာမှဆက်မပြောဖို့ ခေါင်းသာမသိမသာခါယမ်းပြလိုက်သည်။ ငိုချင်နေတာကို မငိုပါနဲ့ နှစ်သိမ့်နေလည်း ဘာမှအရာထင်မှာမဟုတ်။

ငိုချင်တာ ငိုစမ်းပါ လွှတ်ထားချင်ပေမဲ့လည်း ကြာလာတော့ စိတ်‌ညစ်လာရသည်။ စန္ဒာကပါ မျက်ရည်လည်နေပြီ။

မိုးမြင့်ဇော်ကလည်း ရတီငိုနေတာကို မငိုပါနဲ့ မတားမြစ်ဘဲ tissueသာ အဆင်သင့်ထုတ်ပေးနေသည်။ ယပ်တောင်လေးခပ်ပေးရင်း မောရင်သောက်ဖို့ လက်ထဲမှာ ရေဘူးတစ်ဘူးလည်း အဆင်သင့်ကိုင်ထားသေး၏။

" အဲ့တာများ.. ဒီနေ့Term paperလာမလုပ်နဲ့ပေါ့.. အဲ့တာဆို နင်နောက်တစ်နှစ်ထပ်နေရပြီ... "