မနက်စာစားပြီးတာနဲ့ အစ်ကိုဖြစ်သူပေးပို့လာတဲ့ စာရင်းတွေ ပြန်ကြည့်နေလိုက်သည်။ အပြန်အလှန်စကားပြောဖြစ်နေရင်း ကိုကြီးဆီကနေ စွမ်းရည်လင်းရော မေးလာမှပဲ ကိုကို့ကို သတိရသွားသည်။
ဒိီနေ့အလုပ်မသွားရတာကြောင့် အိမ်မှာပဲ ရှိနေသည်။ ဒါပေမယ့် အသက်ရှုသံမကြားရအောင် ငြိမ်သက်လို့နေ၏။ ဘယ်လောက်တောင်ငြိမ်နေသလည်းဆို သူမကိုယ်တိုင်ပင် ကိုကို အခန်းထဲမှာရှိနေတာကို မေ့လျော့နေပြီး အလုပ်သွားတယ်ပဲထင်နေတဲ့အထိဖြစ်သည်။
တိုက်တိုက်ဆိုင်ဆိုင် မမစုပြည့်ဆီကနေ messageဝင်လာတာကြောင့် ချက်ချင်းပဲ ကိုကြီးနဲ့ စကားဖြတ်လိုက်ပြီး ကိုကို့ဆီသွားလိုက်သည်။ ရှိနေမယ်လို့ထင်မှတ်ထားတဲ့ ဝရန်တာမှာရှိနေသော်လည်း လက်ထဲမှာ စီးကရက်ရှိနေတာကြောင့် မျက်မှောင်ကြုတ်မိသွားတော့သည်။
" ကိုကို... "
အသံကြားတာနဲ့ သူမကိုလှည့်မကြည့်နိုင်ပဲ စီးကရက်မီးအရင်ငြှိမ်းနေလေ၏။ တမင်တကာ ကိုကို့အနားကိုမသွားပဲ ခပ်လှမ်းလှမ်းမှာ ရပ်နေလိုက်တော့ မြင်နေတွေ့နေကျအတိုင်း ပြောင်ချော်ချော်အပြုံးကိုသာ တွေ့မြင်လိုက်ရသည်။
" ဝရန်တာမှာ အပင်တွေရှိနေတာကို... "
" ဆောရီးပါကွာ... "
" ဒီမှာဘာလုပ်နေတာလဲဟင်.. ကိုကိုအရမ်းငြိမ်နေတော့ အိမ်မှာမရှိဘူးထင်နေတာ... "
" စဉ်းစားစရာရှိနေလို့... "
တလှမ်းချင်း သူမအနားကို တိုးကပ်လာတာနဲ့အမျှ စီးကရက်အနံ့နဲ့အတူ ရေချိုးဆပ်ပြာအနံ့က နှလုံးသားထဲအထိ နက်နက်ရှိုင်းရှိုင်းပျံ့နှံ့သွားတာမို့ ရောဂါရမှာတွေလည်း ဂရုမပြုနိုင်တော့ပဲ ကိုကို့ရင်ခွင်ထဲသာ တိုးဝင်မိတော့သည်။
" တမနက်လုံးစဉ်းစားနေတာ အဖြေတွေ့ပြီလား.. ဟင်... "
" မတွေ့သေးဘူး... "
" ဘာစဉ်းစားနေတာလဲ... "
" စုပြည့်စုံလင်းအကြောင်း... "
KAMU SEDANG MEMBACA
ICY : Sugar Free Ice Cream
Romansaကျနော်တို့ နှစ်ယောက်လုံး မချစ်တက်ဘူး။ ကိုကိုပြောတာ ဟုတ်တယ်။ သိပ်ချစ်ကြတဲ့ ချစ်သူတွေ မဟုတ်ဘူးနော်။ BOY x GIRL Own creation Burmese Fiction Start - 04.09.2022 End - 11.05.2023 Cover - Pinterest
