ICY : Sugar Free Ice Cream

Conversation - 12

Screenထက်က ဟုတ်ကဲ့ ဆိုတဲ့ စာသားကို အသည်းယားစွာနဲ့ပဲ ကြည့်နေမိသည်။ ဘာဆက်ပြောရမယ်မှန်းလည်း တကယ်မသိ။

စွမ်းရည်လင်းကို သိကျွမ်းခဲ့ပြီးနောက် မွန်မြတ်သန့်စင်ရဲ့ နေ့ရက်တွေဟာ ရှုပ်ထွေးနေသည်။

စောင့်ဆိုင်းရတာကိုမကြိုက်၊ စိတ်ရှုပ်ရတာကိုမကြိုက်၊ ပရိယာယ်သုံးရတာကို နားမလည်သူမို့ သူနဲ့ပတ်သတ်ပြီး ဖြစ်ပေါ်လာရတဲ့ ခံစားချက်တွေကို မကောင်းမြင်နေမိသည်။

ရတီကတော့ နင်က အချစ်ကို သေချာမခံစားဘူးသေးလို့ပါဟု ပြောလာသည်။ ထပ်ပြောလာတာက ပင်ပန်းရပေမဲ့ စောင့်ဆိုင်းနေမိတာပဲမလားတဲ့။

သူပုံစံက အေးတိစက်အေးစက်နဲ့ စကားအပိုမပြောတတ်မှန်း သိထားပါသည်။ စိတ်၀င်စားပါတယ်လို့ ၀န်ခံထားတဲ့ မိန်းကလေးကိုပင် ဒီလိုပုံစံနဲ့ပဲ ဆက်ဆံတော့မှာလား တွေးမိတော့ ရင်မောသွားရသည်။

သူ့ကို တစ်ခုခုထပ်ပြောစေချင်သည်။ စားပြီးပြီလား၊ ဘာဟင်းနဲ့စားတာလဲဆိုတဲ့ စကားဆိုရင်လဲ အဆင်ပြေသည်။

ပြောစေချင်တဲ့သူက မပြောဘဲ၊ မပြောချင်တဲ့သူက အလ္လာပသလ္လာပတွေ ပြောလာချိန်မှာတော့ တကယ်ပဲ စိတ်ညစ်ညူးသွားရတော့၏။

Onထားတဲ့ Active Statusကို ပြန်Offလိုက်ပြီး Chat Headsကိုပါ ပိတ်လိုက်သည်။

ခုနစ်နာရီကနေ ညဆယ်နာရီထိုးတဲ့အထိ လူကယောင်ချာချာနဲ့ဖြစ်ရပြီး စိတ်လွတ်ကိုယ်လွတ်ဖြစ်နေမိသည်။

စွမ်းရည်လင်းမှာ ဘာမှော်အစွမ်းတွေ ရှိနေသလဲ တကယ်ပဲ မပြောတတ်တော့ပါဘူး။

လူက Period timeမှာဆိုရင် ဟိုတွေးဒီတွေးနဲ့ အတွေးများပြီး ကယောင်ခြောက်ခြားဖြစ်တတ်တာမို့ Relaxဖြစ်ဖို့ Yogaလုပ်ရင်လုပ်၊ ဒါမှမဟုတ် သီချင်းနားထောင်လေ့ရှိသည်။