ICY : Sugar Free Ice Cream

Reasons - 32

" နင့်အဖေ့ဆီ ခဏတိုင်းသွားတယ်ဆို.. ကျောင်းတက်ဖို့ နင့်အဖေက ဘယ်လောက်ပေးလဲ... "

" အဲ့တာတွေမေးမနေစမ်းပါနဲ့.. ကျောင်းလခဘယ်လောက်သွင်းရမှာလဲ.. ဘယ်လောက်ဖြစ်ဖြစ်ပါ.. မေမေအကုန်ပေးမယ်.. ဟိုမှာ မင်းဦးလေးလဲရှိတာပဲ .. လိုအပ်တာအကုန် ပြောလို့ရတယ်... "

" မမတို့များနော်.. ရှာသမျှအကုန် သားသမီးအတွက်ပဲ... "

အဲဒီလိုပြောကြေးဆို အန်တီလေးလည်း သူများအမေအိမ်မှာ လိုက်ကပ်နေတာမဟုတ်ဘူးလား။ မေမေရှာသမျှက မောင်နှမသားချင်းတွေအတွက်ပဲ မဟုတ်ဘူးလား။

သည်းခံနိုင်စွမ်းတွေ မြင့်မားနေလို့ ဘာတစ်ခွန်းမှပြန်မပြောတာ မဟုတ်ဘူး။ ပြန်ပြောလိုက်ရင် မိဘက မဆုံးမဘူးလားဖြစ်မှာ စိုးရိမ်လို့။

အန်တီ့ဆီက အပြောခံရရင် မေမေက ငါ ဆုံးမတယ်၊ အဖေ,မဆုံးမတာလို့ ပြောမှာ။ အဲ့ကနေ မီးခိုးကြွက်လျှောက်ဖြစ်ကုန်မှာ စိုးရိမ်တာနဲ့ပဲ ဆူပူဆောင့်အောင့်နေသမျှကို သည်းခံပြီး ငြိမ်နေရတာ။

" သားသမီးတွေ မွေးထားပါရဲ့.. တစ်ယောက်မှ အမေ့အနားနေပြီး ကူညီရကောင်းမှန်း မသိကြဘူး.. မွေးရကျိုးနပ်လိုက်တာများ.. ပိုက်ဆံတွေတော့ လာတောင်းကြပါရဲ့... "

" ဒုက္ခမပေး ပြဿနာလိုက်မရှင်းရရင် ပြီးတာပဲအေ... "

" အဲ့လိုနဲ့ နှစ်အိမ်ထောင်မွေးတဲ့ခွေးဖြစ်နေမယ်... "

မျက်နှာမကြည့်ချင်လောက်အောင် စိတ်ပျက်ရလာသည်။ တစ်ခါတစ်လေ လာတဲ့သူတောင် ဒီလိုပြောခံနေရတာ၊ ငယ်လေးဆို ဘယ်လိုများနေမလဲ။

" ကိုယ့်သားသမီးကိုသာ ဆုံးမပါ.. သားသမီးက ငယ်သေးတယ်.. ကိုယ့်ယောက်ျားကိုသာ နှစ်အိမ်ထောင်ဖြစ်မနေအောင်ထိန်း... "