ICY : Sugar Free Ice Cream

Extra - 10

" ဘယ်တုန်းက ပ်ိုက်ဆံအိတ်ကို အဲ့လိုအရောင်ကိုင်တာမြင်ဖူးလို့လဲ! "

" ငါဘယ်လိုလုပ်သိမှာလဲ! "

" မသိရင် ညီမလေးကိုအရင်မေးကြည့်လေ.. ပြီးတော့ ညီမလေးကို အဲ့လိုမျိုးလာမအော်နဲ့... "

" ‌နင်အရင်စကားကို အော်ပြောတာမဟုတ်ဘူးလား! "

" ကိုကြီးဘယ်တုန်းက ညီမလေးကို ဒီလိုမျိုး အော်ပြောဖူးလို့လဲ... "

မွန်မြတ်သန့်စင်ရဲ့ မြင်ဖူးလို့လဲ နဲ့၊ အော်ပြောဖူးလို့လဲ ရဲ့ အသံအနိမ့်အမြင့်က သိသိသာသာကို ကွာခြားသွားသည်။

ထူးသန့်စင်ကလည်း နည်းနည်းမှအလျော့ပေးမည့်ပုံစံမရှိ။ လူကြီးမိဘတွေရဲ့ မျက်ကွယ်ရာမှာမို့ အနှစ်နှစ်အလလက မကျေနပ်ချက်တွေကို ဒီနေ့မှာပဲ အပြတ်ဖြေရှင်းမည့်သယောင်နှင့် ကြောက်မက်ဖွယ်ရာကောင်းတဲ့ မျက်နှာကြီးနဲ့ဖြစ်လေသည်။

ပြဿနာရဲ့အစကတော့ မွန်မြတ်သန့်စင်ရဲ့ အနည်းငယ်ထူးဆန်းသည့်အကျင့်ကြောင့်ဟုဆိုရမည်။

ဗုဒ္ဓဟူးနေ့မှာ ခေါင်းလျှော်ရင် လာဘ်တိတ်သည်ဆိုသည့် ပြောစကားကို အယုံအကြည်မရှိပဲ၊ ပိုက်ဆံအိတ်ကို အညိုရောင်နဲ့အနက်ရောင်ကလွဲပြီး တခြားအရောင်ကိုင်ရင် ငွေမမြဲဘူးဆိုသည့် အယူအဆကိုတော့ ယုံကြည်လက်ခံတတ်ခြင်း။

ဒီနေ့ မောင်နှမနှစ်ယောက်သား တစ်နေကုန် ဟိုဟိုသည်သည် အလည်အပတ်ရောက်ဖြစ်ကြသည်။ လိုက်ပို့ပေးရသည့် အဖိုးအခအနေနဲ့ ကိုကြီးကို အိတ်တစ်လုံးဝယ်ပေးပါ တောင်းဆိုလိုက်သည်။

ဘယ်အရောင်လှသလဲ ရွေးချယ်နေချိန်မှာပဲ ကိုကို့ဆီကဖုန်းဝင်လာသည်။ ဖုန်းပြောပြီးချိန်မှာ ကိုကြီးက သူ့စိတ်တိုင်းကျ ရွေးချယ်ဝယ်ယူပြီးပြီဖြစ်သည်။