نجع الجن تأليف سماح عياد (عريس من تل أبيب )

إقتباس ٤

فهمي : ها يا شباب كل واحد عرف دوره كويس .
مصطفى : كله تمام و الأوراق كلها جاهزة و منى إتصلت وأكدت الحجز بإسم شركة الجابر جروب .
عادل : يا ولاد لو حد فيكم إتأذى هقول لعمي معوض ايه .
فتحي : تقوله عيالك رجاله و بيصونوا الأمانه اللي وصاك عليها عمي عمار قبل ما يموت .

تفتح ملك الباب و تقول أنا رايحه معاكم .
عادل : رايحه فين يا بت إنتي .
ملك : أنا عارفه كل حاجة و مرقباكم و مسجله كل إجتماعاتكم ، و ربي و ما أعبد إن ما دخلتوني معاكم لكون قايله لأبويا و النجع كله و شوفوا بقا هتتصرفوا إزاي .
عادل بغضب شديد : أنتي جرا في مخك حاجة يا بت إنتي ، دا أنا أدفنك هنا و لا إنك تروحي معانا ، و لو عايزه تقولي للنجع كله و لو حتى عايزه تبلغي الحكومة روحي ، لكن فكرة إنك تروحي معانا تنسيها خالص ، إحنا رايحين ننقذ واحدة و لا نضيع التانيه .
فهمي : ملك كلنا عارفين أنك جدعه و تفوتي في الحديد و لكي كمان في التكنولوجيا و ممكن تفيدينا ،
لكن مينفعش ، منبقاش رجالة لو جاتي معانا .
مصطفى: إحنا لو قطعونا حتت متفرقش مع أي واحد فينا ولا تفرق مع أي واحد في النجع لأننا رجالة و لو موتونا بردوا رجالة و رفعنا رأس أهلنا ، لكن إنتي عرضنا يا بنت عمي ، يعني لو واحد بس فك حجابك و شاف شعرك أو حاول
فتحي بغضب : وديني أقتلهم كلهم و أولع فيهم هما و اللي يتشدد لهم ، غوري يا بت غوري من هنا و قولي لأبوكي إحنا جايين لكم الليلادي .
ثم يفتح الباب و يقذف ملك بالخارج و يغلق الباب .
عادل : نروح نعمل ايه عندهم .
فهمي : البت دي مجنونة و ممكن تعمل أي حاجة و خصوصا إن روحها في سلوى و عيالها .
مصطفى : يعني هتعملوا ايه .
فتحي : هتجوزها و ناخدها تترزع في الفندق و تتابع العملية من على الكمبيوتر و لو عوزنا حاجة من على النت تعملها و هي في مكانها و بعدان هي بتعرف تسوق عربيات كويس .
عادل : مستحيل نبهدل البنات معانا .
فتحي : بنات هما فين البنات ، أوعى يكون قصدك على الأخ ملك ، دي كل علاقتها بصنف الحريم إ ن إسمها ملك و الحجاب اللي لابساه ، دا حتى إسمها مفيهوش تاء التأنيث .
عادل : يعني أقول لنضال يكلم خاله يزود كمان نفر .
فهمي : لأ هي مش هتدخل معانا فلسطين ، بس قوله يزود كمان أوضه للعرسان .
فتحي : هههههه عرسان مين يابه ، الحاج ملك دي عمرها مالبست فستان دا أبوك حكم على كل بنات البلد ممنوع البناطيل و قال البنطلون للولاد بس ، هي كل لبسها بناطيل ، إفهم بقا يا عم ، حتى أبوك مش مقتنع إنها بنت .