#smile
........ الحياة بالنسبة لي ليا هي السعادة.. بلاك مبادئي وافكاري غريبة عليكم اما نآمن بنو أي مشاعر نحسو بيها رايحة نعبرو بيها على شكل ابتسامة...
هيه... أنا إنسان بايع عقلي فالمزاد العلني بالمجان... و الحياة عندي لعبة تركيب ملونة وكل خطرة تركب حتى تكملها....
لكن مع شخصية كيما تاعي خلات عندي مشاكل بزاف في الحياة.... اولهم المجتمع لي فكل دقيقة يخليك تتوسوس لروحك...ويخليك كل خطوة تخطيها تحسبلها الف حساب... أما أنا عرفت هادي الحاجة قبل عشر سنين واليوم راني نخدم فالحاجة لي
نحبها.... أنا مهرج... أنا طبيب مشاعر....
كي تسمعو كلمة مهرج اول حاجة تقولو كبير وجايح ومنلومكمش على هذا التفكير... لانكم مثلكم مثل أي شخص في المجتمع الجزائري..
هذا يعتبر شغف بالنسبة ليا... هو طموح ومهنة مثلها مثل أي مهنة تعرفوها... لانو فن رسم السعادة فن صعب وفي نفس الوقت جميل..
مش اي واحد رح يعرف يرسم السعادة على وجه شخص ويخليه يحب الحياة ويحب يعيشها....
وقرايتي في علم الاجتماع لي ما استفدت منها والو الا انها خلاتني نعرف نقرا الناس اكتر.. عرفت عقليات بزاف ومشاكل ناس بزاف مع الحياة... وانا كنت نعطي لكل واحد نتلاقاه يد عون وأمل جديد بنو الحياة تستاهل نعيشوها فرحانين...
كان نهار طويل... دخلت للدار عيان بزاف نسمع فالقرآن من بيت يما..... لقيتها حاطة قناة اقرأ وراقدة على البونك تع الصالون.. و تصويرة بابا بين يديها... صراحة مزلت حاير كيفاه مقدرتش تنساه لحد اليوم.... عدات تسع سنين ملي مات وفي كل ليلة تتفكرو وتبكي عليه وعايشة على صورو وذكرياتو.....طفيت التيلي وغطيتها بالزورة تعها.... علابالي مشربتش دواها ورقدت كي العادة....
دخلت دوشت ونحيت العرق... مسحت وجهي من الألوان لي رسموهم اللولاد على وجهي وتكيت ونسترجع لقطات اليوم كامل.... صراحة كل يوم نحسو مختلف على لي قبلو..
كل يوم نتعرف على عباد جدد وناس جديدة.. وحكايات جديدة... تخليني نحب خدمتي... اللولاد لي كل يوم يعنقوني ويعمروني بوسات وكلمات حلوة تحسسني انو انا شخص مميز ومكانش واحد كيفي....
دورت على الجيهة الأخرى ورقدت متحمس نبدأ يوم جديد....
نضت على صوت الوالدة تغني لفيروز ههه والفت دايما بالحالة هادي... تحل روتانا القديمة وتبدا معاها وهي دير الفطور.... غسلت وجهي وخرجت بالشورط بش ناكل... لبارح متعشيتش حاسس بمصراني يتعصرو....
صبحت عليها وبستها على خدها ولازم تحمار وتحشم مني.... اه يا لالة فطوم مزلتي تحشمي من ولدك.....
قعدنا انا وياها نفطرو والسكات في الدار كاملة
حتى سمعتها نطقت واخيرا...
"... تيمو... كتاه ناوي تخدم خدمة كي الناس؟"
هاو دخلنا فالسيجي لي نكرهو بزاف...
"... يا فطوم يا غالية... حكينا فالسيجي هادا انا عاجبتني خدمتي وفرحان بيها... ولوكان لقيت خدمة تساعدني لوكان درتها...."
"... تميم كتاه ناوي تكبر وتدير عقلك... راك تسعة وعشرين سنة... لي قدك راهم باولاد وحالين ديار ونتا مزلت تلعب مع الذراري وتغني ليهم..."
"...علاه مش حابة تفهمي يما... أنا حاب خدمة نرتاح فيها... أنا كي نشوف ضحكة طفل مريض بالكونسار راح يموت الدنيا تحلا في عينيا..... أنا نقدر نعالج ناس بزاف غير بالجياحة هادي لي تهدري عليها.... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)