smile [مكتملة]

الحلقة 9

#smile

".... ههههه والله تضحكو... أنا رايح ونتيا قعدي يا زبدة تع الميلود.. ووبلاطاي تاعك تولي بقرة الميلود.... هههههه والله فكرة ندير عليك مسرحية ونزيد نربح دراهم على ظهرك نسميها بقرة الميلود...."

تيراتو ببشماقها جات في ترمتو قد قد....
"... كملو عليا من قدام ومن ورا ونقعد كي المرا.... ههههههه "

راح يجري للبيت ويخمم غدوة وين يهمل بما انو معندو حتى خدمة... بقا يحسب فالدراهم
وحكم التلفون يكونكتي.... ولي يلقاها طفلة يبعتلها..... حبيبنا حلاب من الكبار ... يتمسخر بيهم حتى يشبع... مسمي فايسبوك المهرج المغوار.... بش يتمهبل بالناس... حكا لكريم على وش صرا معاه لوخر شبع ضحك عليه....

مبعد جات في بالو هاديك المرة لي شافها... جاتو عبدة غريبة عليه... وفي نفس الوقت حسها انو مميزة.... قدر يقرأ في عينيها الضعف والحزن الشديد... هو ساهي ألفت نظرو اعلان على فرقة ترفيهية بش يحضرو عيد ميلاد ولد رئيس البلدية..... وحاطين مبلغ كبير مقارنة مع لي مالف يديه هو...

جاتو فكرة انو يجرب وبلاك يخليوه ينشطهلهم الحفل ومنها يقدرو يلمو دراهم عملية خو كريم... رقد وفي بالو انو يروح بش يتلاقا مع الجماعة ويتفاهم معاهم....

كانت راقدة وحاطة يدها تحت المخدة... تخمم في حياتها وين رايحة وجا في بالها الدقيقة هاديك براء اذا تعشا ولا لا واذا هديل خدمت واجباتها.... والحفلة لي حطت اعلان عليها... وهادي المرة توفيق رح يقتلها لا محالة.... حاولت تهرب وترجع عند عايلتها اما الجواب كان حنا معندناش بنات يطلقو.... نتي لي حبيتيه.... شوفي خوك او عندو طومبيل لوكان تطلقي راجلك ينحيهالو.... تحوسي ترجعينا للفقر.....

جمل وكلام وحكايات تقالولها كي حبت تعفص على قلبها وتبعد عليه.... تفكرت كيفاه شافتو اول مرة فلافاك.....
Flash back
".... زينب... اه زينب ارواحي تشوفي الزل لي هبط من هاديك الطموبيل.... قالك باباه لباس بيه...."
"... مزلتي برك.. اصلا تعرفيني معنديش مع التمسخير هادا هيا ندخلو للفاك...."
".. اقعدي نتيا هكدا حتى تبوري هنايا... أنا نجرب فرصتي ونديه بلاك نتزوج ونتهنا من المزيرية لي عايشينها.... "

".... ههههه انا نقول حمدالله على كلشي.. أنا توخرت باي باي... "

مشات تكركر في حجابها وتعدل فيه... تبسيمة خفيفة و وجه بريء تحسها ملايكة....

دخلت وقعدت في بلاصتها لولة... وحلت رواية تقرأ فيها... وغاطسة في عالم خلاف....

End flash back
تبسيمة رافقتها دموع قهرة واشتياق... بلاك ربي يعاقب فيها على غلطها في الماضي.. يعاقب فيها على انو خدات حياة مش تاعها ومكنتش قنوعة... وهي في عز هاداك الحزن جاتها في بالها.... كلمة " smile" لي قالهالها هداك الجون... كي تتفكر وش صرا تحب تضحك... بصح مفهمتش كيفاه طاوعتو و تبسمت... كأنو كانت منومة.... لهاد الدرجة ولات تتأثر مع أي عبد يقولها كلمة مليحة... ولات تحس كلمة شكرا حلم.... لانو والفت تمد وما يردولهاش... حياتها عبارة عن عطاء ولا مقابل....