#smile
بعد عقد صلح مع قلبي المحطم... لبست قشي بزربة علابالي توخرت على كريم... ليوم يقتلني هههه ليوم ينطق مفيهاش....
هزيت قرعة ما من الفريجيدار ونسمع فيهم يهدرو... هدرة نسا وتمنشير كي العادة...
"...." وين رايح تميم..؟؟ متوحشتنيش موليتش تسقسي على ختك وتحوس عليها.. "
".... هاكي ساكنة عندنا كل يوم راكي هنايا هههه علاه نسقسي... ختي متعمريش راسك وحبسي نداب... اتلهاي براجلك وولادك وروحك... وخليكي من المشاكل لي معندها حتى معنى لانو رايحة تخربي دارك بيدك صدقيني.... "
"... والله ماني حاسة بحاجة.... الضغط وزيد لوجاع والهرمونات غلبوني... ومع قرب شهري وليت حساسة شوية.... "
تبسم وراح حضنها وباسها... ختو الكبيرة ونوارة دارهم كيما يسميها .... خرج يجري وهاز كرطابل ويجري كشما يلحق على صاحبو.
والبسمة مفارقتوش... انسان بشوش ومتميز بالشخصية هادي في منطقتهم... يضحك الناس و َيفرحهم.....
وصل لقدام واحد السبيطار كبير تع لولاد... لقا صاحبو كريم قاعد ويدو على خدو وباين مسكين تشمس وتحرق....
".. هاني جيت.... سمحلي علابالي طولت اما اك علابلك الدار وزيد عطلتني زبيدة وولادها..."
شاف معاه كريم مخنزر وراح يطرطق ومبعد تفجر فيه... ويهدر بيديه يحاول يشرحلو.... بسيف بش هدا وبرد...
كريم صاحب تميم من خمس سنين تلاقاو في مكتبة... كريم للأسف أخرس يعني ما يهدرش..
ويتواصل غير بالاشارة مع الناس... وكي حب يشري وحد الكتاب... مولا المكتبة مفهموش.. وتميم بحكم احتكاكو الدائم مع اللولاد والناس لي ميسمعوش وميهدروش تعلم اللغة وولا يقدر يتواصل بيها وعاونو بش يشري الكتاب
ومن هداك الوقت ولاو صحاب عزاز بزاف على بعضاهم.... وكريم ولا يخدم معاه تاني...
دخلو مع بعضاهم وتميم يحاول يرضي فيه
بسيف بش نحا التكميشة من حواجبو... اول بيت في السبيطار لقاها فارغة بدل قشو ولبس قش الكلون.... وكريم يتفرج فيه..
"... علاه قاعد تتفرج فيا درك نوض البس حاجة على الاقل كي يشوفوك اللولاد يفرحو شوية... و متنساش شريكي رانا نخدمو في خدمتنا وزيد سالكين عليها..."
داولو بيدو بمعنى مانيش حاب...
"... كريم دايما هكدا... اول مرة دير حاجة مليحة في حياتك....عجبتك حالة خوك... لازم دراهم بش تلم للعملية وراني ندى فدراهم غير على جالك... مانيش محتاج..."
تنهد كريم بأسى وحزن ظاهر في عينيه..رايح يبكي... الخرس تاعو خلاه عاجز... حاسس بالضيقة...وخوه لازملو عملية....
حس بيه وراح ليه متبسم...
"... كيمو وتيمو... هههه شفت الأسماء كيفاه خارجين على بعضاهم... حنا كلون اورجينال..
... علابالي بيك مش حاب هاد الخدمة اما والله هدا برك بش يعاونك... اصلا بقاتلنا غير عشر ملاين برك.... و نقدرو نديرو هالو... وراح يرجع كيما كان واحسن.."
عندو قدرة عجيبة في شفاء الناس نفسيا وروحيا.... لقا كريم معنقو و يتبسم... تحسهم خاوة بالدم مش صحاب....
خرجو من للبيت وهبطو في قاعة كبيرة فيها لولاد نصهم مساكن وجهم صفر وشعرهم طايح... وكاين لي هدا وين بدا يطيح... صعيبة انك كل نهار تشوف شعرك يطيح وانت متقدر دير والو... سيرتو كي يكونو ولاد صغار...
لقاهم جاو يجريو يعنقو فيه وهو يضحك وبدأ بالتبهليل تاعو معاهم شطيح ولعب وغنا ورسم فالوجوه... بقناع المهرج هو يكون طفل بريء كيفهم... يخليك تنسى نضوجك وعمرك وتولي في مثل عمرهم..
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)