#smile
وهادي اول عقبة.. الوالدة بالنسبة ليا حاجة عزيزة بزاف هي والواليد ربي يرحمو... كانو ابوين مثاليين حياتي كاملة منقدرش نردلهم حقهم... أما كأي والدين بعقلية قديمة.... دايما نتناقشو في موضوع خدمتي بالذات.... و بالأحرى نتقابدو.... بابا كان عسكري وتقاعد وعقليتو صعيبة بزاف سيرتو معايا.... كان ينوضني نصلي دايما ومخليني نشبهلو في كلشي حتى القراية قريت وش حاب هو... مكنتش انسان قراي اما نسلك روحي الحمد الله.... الحاجة لي كانت تهين عليا السيطرة تاعو هي نظرة الافتخار من عينيه... بالرغم من صعوبتو معانا اما حنيتو مكانش كيفها... يضربني وفليل يجي يبوسني ويدعيلي بالفرح والهنا.... كان كل ما يسمع في الناس يشكروني ويمدحوني يبتسم ابتسامة تخليني راضي على روحي من جيهة والديا.....
صراحة في يوم موتو.... مت وزدت حييت... السند تاعي فهاد الدنيا راح ومش راح يولي.. راح ومعلاباليش اذا راضي عليا ولا مش راضي.. مسامحني على انو عصيتو ولبست شابو المهرج ولا لا..... تساؤلات بزاف تجي في بالي اما اليوم راني فرحان.... عايش مع يما وهانيين بلا مشاكل.....
سمعت الحس ولعياط تع لولاد جاي.... يا ربي لعزيز السنافر تع زبيدة جاو.....
خرجت من البيت لقيتها جايا ومحملة كابة.. باينة الحالة مطولة.... ومحسيتش الا و زوج فيران لصقو فيا ويسلمو والبزاق عمرني من فامهم.....
سلمت عليها يما وبدأت بالكا تاعها.... مفهمتش كيفاه حامل راجلها لفشوش تعها... لوكان جيت منو نطلقها هداك النهار.....
".... يما هئ هئ الرخيس تع ميلود قالي بنو وليت باشعة وبقرة... رايح يتزوج عليا يا يما هئ هئ...."
والدراما تعها جامي تخلص... يا الميلود المغبون....
"... واش زبيدة مزلتي مع مشاكلك لي ميخلصوش.... يخي معندكش شهر ملي جيتينا ولا زاد الميلود بالك فالفراش.... ههههه "
".... هئ هئ يما شوفيلو مش حاب يحشم.. قتلك الف مرة عيطلي زوزو مش زبيدة متفهمش واصلا هادي داري ونجي وقت ما نحب يخي يما..."
تبسمت فطوم وحضنتها... وخنزرت فيا...
"...... وي يا بنتي هادي دارك هيا جوزي وزيد توحشت لولاد... "
هبطت عينيا لقيت ولدها الصغير يمسح فالخنونة في سروالي ولوخر جبد سون ميل من الجيب بلا ما نفيق وهرب..... وبدأت المطاردة.... وفلخر دخل للتولات وقفل عليا الباب الحلوف.....
".... شوف يا وسيم لوكان متخرجش درك وترجعلي الدراهم والله غير نشبعك طرايح هاتها لهنا وأخرج..."
حطيت راسي على الباب نسمع فالما وسلق وسلق.... حاجة تقطعت ويا قلبي ويا المرارة ويا المصران كلشي تقلب عليا.... ياه قطعها ولد الكلب....
"... وسيم حبي عمري... اخرج ولدي و َهاتلي الدراهم بش يشريلك خالو الشيكولا هاديك... "
"... صح تشريلي؟؟؟ بصح جيب مياتلف خلاف بسك هادي.....
حل الباب وخرج هاز المياتلف المغبونة مقسومة على اثنين وزيد سردانة بالما.... حسيت بدمعة هبطت من عينيا... القلب تشوى والعينين دمعت....
وهادي وحدة من المعاناة مع ولاد ختي زبيدة
يا خويا عندها غوال بش ولاد في عمرهم ربع سنين....وسيم و رسيم هادو الزوج اسوء كوابيسي.... كي يجيو اعرفو بنو نخرج عريان من الدار نورمال.....
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)