#smile
".... لا منقدررررش خليني نروح خايفة تروح يما ومتلقانيش فالدار تعيش بعد..."
بعد عليها شوية بش يخليها تتنفس... ونطق بصوت جاد..
".... ديريها في بالك حنان بنو انا برك لي نديك.. أنساي اي واحد... كاين غير انا كريم وبس... رايحة تحطي على اسمي انا..."
طلعت عينيها معاه... لوكان تزيد شوية تموت في الدقيقة... اسخايل روحك توصل لأقصى درجات الحب مع شخص.... يخليك النفس تاعو تقدسو لانو بالنسبة ليك هو كلشي... اي حاجة مليحة رايحة تتجسد فيه هو..
حابة تعيط وتقول نحبو يا ناس.. نفنى فيه.. نموت عليه.....اما الأب مداير حاجز..... هي حابتو وهو حابها اما القدر كلمتو اذا رح يجمعهم ولا لا....
تبسمت ومشات وهو موراها حتى وصلو للبلوك تع الباطيمة... جات طالعة دخل موراها وباسها في رأسها بوسة معزة وشغف كبير خلاها تطلع لفوق وتخليه يضحك عليها وعلى حشمتها منو.... تنهد تنهيدة وخرج
غسلت الماعن هي ومها ومخها مع كيمو...
"... ا طفلة وينك..؟؟ اني نحكي معاك..."
"... مممم اه ماما راني معاك سهيت برك.."
"... باين عقلك معامن يا حلوفة.... ههه احكيلي وش قالك..."
حمارو خدودها ودورت لجيهة لخرى
"... يما ششش شكون لي قالك.. ؟؟؟"
"... ههههه باينة عينيك رايحة تاكلو كي كنتي تشوفي معاه.... وحاسبتني منفهمش الاشارات تاعو راهو كي ولدي... "
"... خلاص يما..... "
"... حشمتي هههه والله دايما ندعيلكم ربي يجمعكم فالحلال يا بنتي الطفل مش رايحة نلقا خير منو.... "
"... نشاله يما نشاله... "
سمعو صوتو تخلعو في زوج يزيد يكون سمعهم...
".... هيا نتي وياها حطولنا قهوة نشربو... "
"... هات ابي عليك الفيستا... "
مدهالها وراح غسل يديه... سناو خاوتها يجيو
وحطو القهوه... كانت قعدة عايلية بامتياز.. سليمان يحكي على أحوال الدنيا والفسق لي ولا فالمجتمعات...و خاوتها يكونيتيو من لهيه وهي قاعدة وتسمع في هدرة باباها... من صغرها تشتي تسمع لخطبتو تع الجمعة.. وتشتي حكاياتو... كل تفصيلة يهدرها تحفظها منو... وهذا خلاها تشبهلو بزاف... حنان بالرغم من سيطرة باباها عليها... و تقييدو ليها لي خلاها متعيشش كيما اقرانها اما دايما فرحانة انو عندها اب كيفو...
تفكت اللمة وكل واحد يروح لبيتو يرقد.. د
لت لبيتها وراحت جبدت كراس كبير... معمر تصاور و كتيبة.... والعنوان تاعو كان كريم وحنان... تصاورهم ملي كانو صغار... كتيبة كتبوها... اي حاجة تشاركوها مخبيتها كذكريات ليها تشبع بيها منو... هزت تليفون خوها بالسرقة....لانو معندهاش تليفون.. وحوست على فيسبوكو..... و تسقي عينيها بيه وفي كل صورة تدعي في سرها انو يجمعهم ربي في سرير واحد....
وهل سيتحقق مبتغاها.. ؟؟؟ ذلك هو المجهول لحد الساعة.... فحبهم الغريب الصادق هو ما الا ورقة فارغة تنتظر فرشاة القدر ان يخط عليها....... ✨
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)