smile [مكتملة]

الحلقة 36

".... ههههههه حكايتك قد ما تغيض قد ما تضحك ههههه"

شاف معاها وتبسم مخليها تفرغ وش فيها... حس روحو ارتاح شوية كي بكا... حس بنو قدر يعالج جرح سنين في دقايق... علاه هدرلها هي بالضبط معلابالوش اما حاسس انو مغلطش كي حكالها...

"... هيا نروحو درك حكينا بزاف... هههه لقضيان لدرك مجبتوش ويما سير تقتلني ههه
... واذا حبيتي أنساي الحكاية... حبيت نبينلك الهدف تاعي من ورا معاونتي ليك.. حاسس بيك ولو شوية... واعرفي بنو هاد الدنيا فيها امل مهما صار...."

نحات نواظرها وشافت معاه...
"... تعرف حاجة درك زدت استعرفت انو انت اكبر غبي شفتو في حياتي... علاه مستعرفتلهاش علاه... ؟؟؟ علاه مرحتش قلتها انو انت تحبها... علابلك راح تتعذب طول عمرك... كل مرأة تعدي رح تشوفها هي... كل ما تشوف صاحبك وحبيبتو مع بعض رح تموت الف موتة.... ليوم باسها وغدوة... يتزوجها وولادها رح يمشوقدامك وانت تشوف معاه وتحضر ولادتها..... "

"... هههه لا عادي والفت الألم تع قلبي.. أما بش نخون صاحبي... هادي جامي تصرا.. رجولتي متسمحليش بهاذا.... حنان تخلقت لكريم وتعشق كريم وانا تخلقت بش نحب حنان اما مش بش نتزوجها.... ولادها رح نسميهم انا ههههه. على الأقل رح ندي شرف هاد الحاجة.... رح نكون كيما باباهم ورح نحبهم كي ولادي..... "

هبطت من الطموبيل وخلاتو لداخل... تتنفس وتخبط في يدها... كل مرة يفاجئها ويثبتلها انو هي أكبر زبل فهاد الدنيا.... فكرها في اسوء حكاية عندها وأسوء ماضي ليها... لفرق انو هي أنانية.... أما هو لا.....علاه هو مثالي هكدا.. علاه هو ناس ملاح بزاف.... هي خاطرت بزواجها وولادها وسمعتها غير بش ترضي غرورها المكسور اما هو قلبو تفتت آلاف الفتات ومهدرش بش ميخسرش صاحبو وهوه وميحطمش قصة حب تعو....

عاودت ركبت وانطلق بيها... عيطت لشوفور بش يجي يديها كانت الرابعة تع العشية... هو خلالها الطموبيل بلا ما ينطق حاجة مشي وخلاها واقفة... حط يدو في جيابو وتحرك... رايح لدار... كان نهار طويل بزاف بالنسبة ليه...
شاف معي السما ودعا لباباه بالرحمة

".. بابا توحشتك ومتخافش ولدك راجل ورح يقعد راجل... نتمنى تكون راضي عليا..."

قضا وش يحتاج ودخل سلم على يماه.. وقعدو يقصرو ويضحكو كي شغل حاجة ما صرات... هدا هو تميم... يتعذب والابتسامة جامي تروح.... #smile حاضرة بقوة في حياتو مهما صار ولا رح يصير....

✨✨✨✨✨✨