#smile
.... مواجهة غريبة من نوعها تجمع ام وابنها بعيدا عن ليلى.... هو مزالو مش فاهم وش دار... حتى يلقا هذي النظرة تع اللوم من امو.. يعني لأي درجة هو غلط.. لأي درجة عصاها ولا غضبها عليه... اول مرة يشوف هاد النظرة في عينيها
"... يما ؟؟؟ وش قاعدة تديري نتي وليلى هنايا.... محتاجة حاجة.."
قربت ليه بخطوات زعزعت قلبو.. وجبدتو من يدو وهو يمشي وراها وليلى موراهم تتبسم بخبث.. ممكن خطتها وحيلتها نجحت اما راهي فتحت أبواب جهنم عليها...دخلو للصالون.... ومزالت محافظة على ملامح وجها مزيرة
"... وش كاين وشبيكي قلقانة... كشما صرا... زبيدة مليحة.. ؟؟"
".. وين رحت نهار الثلاثاء.... ؟؟؟ وين كنت.. ؟"
بقا يتفكر بشوية... كان مع زينب وولادها.. بلع ويقو وتبسم يحاول يخفي التوتر لي ساكنو
"... هههه وشبيك فطوم الغالية كنت في السبيطار الكبير مع لولاد... وليتي تخافي عليا.."
"...تميم متكذبش قولي وين كنت..؟؟ وين رحت هداك النهار... ؟؟ "
".... مفهمتش علاه تحوسي يما... نسيت وين رحت.. تعرفيني نروح لبلايص بزاف.. واصلا ليلى علاه راهي هنايا يخي تفاهمنا السيجي تاعها قفلناه... وش كاين ؟؟ "
"...أنا نقلك وش كاين... "
جبدت التليفون تع ليلى من يدها.. وحطتو في يدو... بقا صافن لحظات يشوف بسيف بش استوعب وش قدامو.... تصاور ليه ولزينب كي كانو فالبارك.... وضعيات بزاف ليهم... حتى كي كان يمسحلها وقريب ليها...
عينيه حمارو و مزالت الصدمة على وجهو... يعني مو عرفت كلشي..ليلى كي شافت الحالة نايضة... هزت ساكها وهربت.. وتخلي الحرب نايضة...
"... شكون هادي لي راك لاصق فيها قولي؟؟ شكووووون؟؟؟"
".. يما اصبري نفسرلك..هي وحد... ؟"
"...تميم المرأة متزوجة وعندها زوج ولاد.. واش راك دير معاها... ؟؟... فهمني رايحة نهبل انطق.."
بقا ساكت مش عارف وش يقول... اصلا مش فاهم علاقتهم... خيانة .. صداقة... حب... ولف.. كره....
مو تصدمت من سكوتو يعني كلشي صحيح... التصاور وهدرة ليلى على علاقتو مع زينب.. كانت حابة تسمع كلمة مكانش منها... أما رآها تشوف في جثة قدامها... عينيه وحالتو... قدرت تفسر بزاف حوايج..
"... تميم لآخر مرة قولي وش يجمعك معاها ولدي... كامل نغلطو... رتحلي قلبي تعيش تميم..."
... مقدرش يتحمل.. قلبو استسلم للحقيقة المرة ولي تهرب منها بزاف... نطق بصوت مكسور ونبرة راجفة.....
"... انا نحبها الله غالب لقيت روحي بلا ما نحس نقرب ليها... قلبي لحمة يما وش ندير..؟؟؟"
قربت ليه وعطاتو بكف قاوي خلات وجهو داير وتراس حمرة عليه ونطقت بقهرة
"... تميم... راهي متزوجة تميم... من بين البنات كامل تدنا لمرأة عندها زوج ولاد ومتزوجة... هبلت.. هكدا ربيتك تدور بحرمة غيرك... وين نحط وجهي درك...؟؟"
طاحو دموعها وهو يشوف معاها حابس الدموع بسيف...
طاح قدام رجلها ويبكي....
"... نحبها يما معلاباليش كيفاش اما نحبها... دخلت لقبي بلا ما نحب... وليت نغير من راجلها... منقدرش نعيش بلا بيها يما نموت....مقدرتش نمنع روحي... لوكان في بالي انو قلبي يوجعني هكا مكنتش رايح نقبل نعاونها ولا نتلاقاها....."
مو صفار وجها وطاحت قدامو دموعها مغطية وجها.... وهو مهبط راسو للأرض...
.... مشاعر تطوف في هاديك الدار.... انتهى المشهد بقهرة ودموع ام... وجرح والم عاشق...
... يردد في كل نفس يخرجه...
...لماذا احببتها ؟؟؟ ❤️💔💔
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)