#smile
... القصة قاعدة في منعطف غريب... مباينش نهايتو من بدايتو...كل شخصية فيها دات حقها من هاد الحياة سواء مليح ولا لا... لانو الحياة جامي كانت عادلة مع البشر اما كاين قانون يطبق فيها وانا نحب نطبقو في القصص انو الخير يقابلو خير والشر شر... مهما كنت بطل ولا شرير ولا شخصية جانبية....
.... قاعدين يتغذاو مع بعض... الجو مالي عليه الهدوء والسكات.... كل واحد في عالم... من بعيد تبانلك انو هادي هي العايلة المثالية... أما كل ما تقرب شوية ليها راح تلقى فجوة في العلاقات... المظاهر دايما خداعة... والسعادة جامي ارتبطت بالدراهم...
... زينب في هاد الايام.. تبدلت من جيهة مشاعرها.... ولات تحس روحها صفات وحتى توفيق مبقاش يهمها كيما كان... مولاش هدفها انو تنتقم منو قد ما حابة تقعد مع تميم وتحكي معاه... وجها أشرق ونفسيتها ارتاحت... بش نعرفو نخيرو الناس الصحاح في حياتنا... هي ملي دخل لحياتها حسنها و عطاها الايجابية لي كانت مفتقدتها وهو ملي دخلت السلبية والمعاناة انتقلت عندو... هو يعطيها الدوا وهي بالمقابل تمدلو السم...
فيقها من شرودها غير صوت هديل وهي تهدر معاها..
"... ماما وكتاه نزيدو نتلاقاو تميم ..؟؟"
براء ضحك وهز يديه
"... مامي... ههههه انا تاني حاب نروح عندو.. عمو... يضحك بزاف..."
... بلعت ريقها ووجها صفار... كي شافت توفيق يشوف معاها وباين علامات التساؤل على وجهو
"... شكون هادا تميم.. ؟؟؟"
"... ه هو هو جا في بلاصة الشوفور كي كان مريض.... تلاقيتو في الجمعية وحب يخدم.."
...بالرغم من التوتر لي كان طاغي عليها اما قدرت تجاوبو ببرود... أما تعرف انو توفيق مش راح يمرر الحكاية على خير...
".... تسما نتيا لي يجي ديري فيه كونفيونس.. وين علابلك هدا شكون.. وزيد مخرجة لولاد معاك... ؟؟؛ منسحقش الحكاية تزيد تتعاود.. "
هزتلو براسها َكملت ماكلتها ترجف... توفيق يقتلها هي وياه اذا عرف حاجة...
خرجت من الدار مع الشوفور... مكانتش الطريق طويلة بزاف... ساعة ساعة تتبسم وحدها كي تتفكر هدرة من هدراتو... يحيرها كس يتنقل من شخصية المهبول والكلون لشخصية الناضج والطبيب النفسي.... تقدر تلمس فيه البراءة وفي نفس الوقت العقل والرزانة.... مزيج غريب ومثير للاهتمام يخليك تحوسي تكتشفي خبايا هاد الشخص وحياتو...
.. حبست الطموبيل في حومة شعبية بسيطة... اوه ليام كي كانت ساكنة هنايا... وتعدي على الخضار .. تشري غزل البنات من الحانوت اللخراني... هههه لعياط تع الجارة....وحيد لي يبيع الما تع العين ويقولك من لاسورس... ههههه يامات هربت منهم وفي نفس الوقت تحن ليهم بزاف.... عرفت قيمة هاديك البساطة والتواضع....
... طبطبت على الباب خرجلها راجل كبير دار كرشو قدامو لابس تريكو... وباين هدا وين ناض من الرقاد...
".... شكون نتيا ؟؟ متخليوش العبد يرقد كي الناس..."
عداتو ودخلت... تشوف في الدار...
"... هادي نتي زينب ؟؟ غيبتيها... علاه مجبتيش الولاد معاك..؟؟؟"
"....مساء الخير بابا... ام يقراو منقدرش نبطلهم...."
".. مممم لمهم وش راه توفيق..؟ مزال مع الفوط تاعو.... "
".... حمدلله لباس عليه.. "
دخل لبيتو يكمل رقادو وهي قاعدة فالصالون تسنى في مها تجي من السوق...
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)