#smile
.... ذكريات جاوها من الماضي كي كانت في هادي الدار...منقولوش سيئة اما ماهيش مليحة تاني... يمكن احتياجها المادي خلاها ترمي روحها للنار قبل ما تخمم... ساعات الطموح يوصل لمرحلة يخلي العبد يدير أخطاء بزاف....سمعت الباب يتحل... دخلت مها زهيرة هازة القفف بجلابتها وخمار تاعها...باين خطوط الزمان على وجها... بنيتها رقيقة وضعيفة.... حتى فالملامح متشبهش لزينب..
.. هزت عينها لقاتها مقابلتها... حطت يدها على صدرها وراحت ليها تحضن وتبوس...
".... هادي غيبة زينب... وكتاه جيتي بنتي؟؟"
"... قبيل برك حللي بابا الباب..."
"... اقعدي اقعدي..."
راحت حطت القضيان في الكوزينة... وقعدت قدامها... علاقتهم مش قوية بزاف... يعني دايما كانت كاينة حدود وحواجز بيناتهم...
"... اهيه وش راهم لولاد؟؟ راجلك معليهش.. "
... علاه دايما يسقسيو على توفيق وولادها.. وهي جامي خمو فيها اذا كانت مرتاحة ولا نو.. تبسمت ابتسامة باردة..
"... بخير يما كامل راهم ملاح متخافيش.."
... عدلت قعدتها وشافت معاها..
".. مام حنا لاباس الحمد الله... باباك راهو يضال حاكملي وجهي لا خدمة لا والو كي هو كي خوك.... ؟؟ كتر خير راجلك لي يمدنا المصروف تع الشهر....."
.... تبسمت باستهزاء ... سنين ومزالو الدراهم هما هدفهم.... جامي راح يتبدلو راح يقعدو ماديين وغير مصلحتهم....
"... يما توفيق مش دايملكم... قولي لحسام يعري على يديه ويخدم والله عيب لي راكم ديرو فيه... "
"... شوفي... علاه لي يصرف على عايلتو عيب.. يخي هو يتيم وانا وباباك وخوك عايلتو كيما عايلتو مافيها والو.... ولا تحبي الخير والدراهم غير لروحك...."
هي وين وهما وين... حابة تطلق منو اما الدنيا كاملة مانعتها.... حابة تتحرر من هاد القيود.. حابة ترجع زينب المستقلة لي تعيش كيما حابة.... حابة تعيش فرحانة مع عبد يحبها وتحبو بلا ضرب وبلا خيانة....
تنهدت بشوية وشافت معاها...
"... يما انا كرهت حياتي مع توفيق بش نقولك... وحابة نطلق منو... تسما غير شوفي خدمة ليك ولولدك...."
.. زهيرة شرعت عينيها معاها مش مأمنة وش راهي تقول..
".... كيفاش؟؟ هبلتي نتيا... حنا معندناش بنات يطلقو... وولادك خممتي فيهم... منين رايحة توكليهم وتقريهم... عايلتك وباباك دوا السكر تاعو منين نجيبوه.... تحوسي ضيعينا وضيعي حياتك.... ؟؟ "
.. حاسة بالعصب ياكل فيها... واحد ما حاسس بمعاناتها ولا الامها.... حاسبينها غير آلة للاستغلال والدراهم....
"... يماااا انا كرهت من كلشي.... حابة نعيش مرتاحة بلا عذاب نفسي... رايحة نحوس على خدمة ونعيش اللولاد... أما توفيق خلاص موليتش نقدر نحمل العيشة معاه كتر..."
.... جبدتها من كتفها... وعيطت
"... شكون لي خيرو ؟؟؟ قولي مش انت لي حليتي رجليك ليه وجيتي بكرشك فالثالث.. مش انت لي جيتي وقلتي بنو هو تزوجك وحنا معلابلناش.....مشاورتنيش كي رحتي عندو ودرك مورا تسع سنين زواج بيناتكم وزوج ولاد حابة تعيشي حرة وتتطلقي... "
..... شافت معاها بدموع حقرة والم...
"... يما هو اجبرني مكانتش برضايتي معاه.. معلاباليش وش صرا... صح كنت نحبو اما جامي مديت روحي ليه... نتوما محبيتوش تشكيو هداك الوقت... في اول فرصة خفت على بنتي محبيتش تعيش في فضيحة.. زوجتو بش يصلح غلطتو معايا انا يبقى مغتصب يما...... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)