#smile
....زينب مش فاهمة وش قاعدة تدير هنايا... علاه من بين هاد الناس كامل لي يعرفهم دار كونفيونس فيها... وهو يعرف حقيقتها.. اول مرة تشوف انو هي انسان يقدرو يشاركو معاه الناس أسرار... ممكن عندها نقص من هاد الجيهة... التناقض لي في شخصيتها يخليها تحمل لداخل كتلة لهيب و جليد... وفي هاد اللحظة الجدار لي بناتو على قلبها... بدا يتشقق ويتحفر فيه... هداك المانع لي خلا مشاعرها مخبيين وطغا عليهم البرود... بدا يذوب ويا ريتو ما يذوب.....
مشات وخلاتو وهو لحقها يجري... ركبت من قدام وهو ركب في بلاصة الشوفور كي العادة.. هديل كانت مركزة مع التليفون متولهتش بيهم.. وهي خنزرت فيه ومشا بيهم...
"... اعقب على براء معاك.."
مشافتش معاه ودورت لجيهة الكارو.. طلع براء فرحان كي العادة ملورا...
"... ماما شكون هدا؟؟"
".. هدا جا يدينا براء للمناج.."
هزلها براسو يضحك
"... واي تسما نروحو مع بعض.. بصح بابا ميروحش معانا..."
تبسمت بخبث تراقب في عروقو التحتانية...عرفتو بنو تغشش ولا تقلق.. كلما تجبد اسم توفيق قدامو... كأنو يحاول يهرب من حقيقة انو متزوجة.... مش عارف لوكتاه راح يقعد يستحمل...
"... بابا مشغول براء... كي نروحو نحكيولو وش درنا كامل... "
"... اوكي بصح المرة الجاية يروح معانا.."
عم الصمت و الهدوء... هو مقدر يدير حتى ردة فعل.. حتى وصلو للمناج... هبطو في ربعة من الطموبيل.....مدلها المفتاح ومشا قدامها.. صراحة يبانو كوبل وولادهم... تحسهم عايلة غريبة من جيهة وحلوة من جيهة خلاف... قعدت في الكرسي لتما وخلاتهم يلعبو وش يحبو.... واصلا هي هاد الجو متحبوش بزاف...بقا يراقب فيها وش تدير.. حركة وجها َجسمها... يدقق كتر وكتر... حتى سمع صوتها نطقت بلا ما تشوف معاه..
"... علاه راك ساكت وتشوف معايا... ؟؟ جيت بش تسكت.. معلاباليش بنو انا زينة بزاف.."
نطق بهيام ونوع من الاعجاب
"... وي تهبلي أجمل وحدة نعرفها في حياتي.."
في سع فاق مع روحو وش قال كح شوية وهي تبسمت.. كأنو تميم الرومانسي يعجبها خير من تميم البهلول....
"...حنان رايحة تتزوج بعد غدوة... راح تصرا فاتحة وراح تولي لكريم خلاص... "
تنهدت وبقات محافظة على نفس الابتسامة
"... اهيه وينو المحير فالحكاية ولا الجزء المهم فيها...؟؟"
فهمها على انو هي مستهترة ومعلابلهاش وش راه يهدر اصلا... نطق بغش بدا يظهر عليه...
".... انا نقلك الطفلة لي كنت نحبها رايحة تتزوج ونتي تهدري ببرود كانو مش هامك.."
هزت حاجبها فيه وضحكت..
"... ههههه شكون لي قالك انا مهتمة اصلا... أنا مديت رأيي في حكايتك بكل بساطة... أنت قلتلي بنو منعرفش الحب ومعشتوش... أنت في رأيك تعرف الحب؟؟.. الحب انو تحارب وتدير اي حاجة بش تحصل عليه... أنت محاولتش.... حتى كي كنت متعرفش كريم.. حاولت انو تعترفلها وتشوف ردة فعلها كيفاه...
نو محاولتش... "
... دور هدرتها في راسو.. كلامها صحيح.. أما علاه يحس بالحرقة كي يتفكر انو رايحة تتزوج... علاه كل ما يشوف في كريم يحس بالذنب...
كملت هدرتها والخطرة هادي شافت معاه بثقة اكبر...
".... أنت وانا جهال بالحب تميم... حنا تخلقنا بش نتعذبو ونتكواو بيه... لانو السعادة والفرح في الحب محرمة علينا في زوج.... أنا اوهمت روحي بنو حبيت توفيق... أما في الحق حبيت
... غرور توفيق... نرجسية توفيق... و هربت من حقيقة انو انا باردة المشاعر وتزوجت بيه..
اما انت اوهمت روحك انو حبيت حنان.. أما انت حبيت عينين حنان... حشمة حنان... تربية حنان و هربت من حقيقة انك شخص تافه و جايح... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)