#smile
بهدرتو هادي خلا قلبها يخبط بزربة... نحات النقاب على وجها ودخلت حاطة يديها على قلبها.... انه الحب يا سادة...
حنان..... شخصية دخلت فالكرو كعاشقة للسيد الصامت....قصة حب رايحة تعشش فحومة العربي...
دخلت لبيتها وقفلت الباب وقعدت تشوف في تصاورو لي مخبيتهم في الخزانة الصغيرة تعها.... تعشقو وتفنا فيه... بالرغم من إشاراتو الرومانسية معاها و مواقفو لا انو جامي اعترفلها بحبو... الكبرياء هو العائق... كل واحد يسنى فلوخر يقول ويفضح وش مخبي الداخل.... بحكم انو عايشة في عايلة محافظة بزاف... الحب حرام... الخرجات حرام... كلشي حرام... تقدرو تقولو محبوسة ومكانش حل..
.. حنان.. مولات الربعة والعشرين سنة... بنت إمام مسجد في حومة العربي... طفلة شابة بزاف وهدا لي خلا العين عليها دايما... يخافو بزاف عليها... ومع هي الطفلة الوحيدة تع الدار في وسط تلت دكورا.... يعني تقدرو تعرفو مدى السيطرة والضيق لي عايشتو... وبالرغم من كلشي... قدرت تحب وتعشق ولد خالتها كريم.... من لي كانو صغار و علاقتهم كانت علاقة مميزة... هي الحضن الدافي ليه بعد موت مو وهو الصدر الحامي و لي يمنعها من بطش باباها و سيطرتو.....
العايلات في زوج كانو مأيدين الارتباط بيناتهم اما.... موت ام كريم و زواج باباه... خلا العلاقة بين العايلتين توتر... و باباها رفض العلاقة... وخلا اللولاد بعاد....
يمكن صمت كريم و ضعف شخصية حنان هو السبة اما قصة الحب هادي رايحة تتكتب...
لحق عليه... قعدو كلاو حاجة خفيفة وخرجو قعدو في بلاصة فارغة... لزوج يبانو قلقانين.. هاز قارو في يدو ويتكيف... حاسس بالضيقة..
"... ونتا علاه محكيتش معاها... ؟"
"... يخي قتلك محبتش اصلا تقابلني... افف اك تعرف هادو صحاب الشكارة... لمهم طاحلي المورال وفسد النهار... تعرف حاجة حا يجي نهار ندير دراهم كبار ونحل سبيطار كبير وتحت يكون كاين بارك للعب... نسميه smile....لي يدخل ليه لازم يخرج فرحان وناسي هموم الدنيا... راح تكون كاينة مكتبة.. مسرح كلشي... بش لولاد ميحسوش انهم في حبس... وميفقدوش الأمل انو حياتهم خلصت.... لازم دايما الابتسامة و الضحكة مرسومة... "
شاف معاه باستغراب وتبسم..
"... علاه نتا دايما إيجابي هكدا... ؟؟ علاه متحسش بالالم ولا الإحباط... ساعات نحسك مش عبد.. تخمم دايما فالناس وانت وين في هادا كامل... ؟؟؟ "
ضحك بالصوت عليه وغمض عينيه مخلي الريح يحرك في شعرو....
"... صدقني.. أجمل حاجة انو تخلي عبد فرحان وحابب الحياة... هههه بلاك تجيك بيزار اما هدا هو هدفي... لانو فرحتي من فرحة الناس..... "
هزلو براسو وكمل القارو يتكيف... دور ليه تميم..
".... نتا مدام راك تتكيف سير لحكاية فيها حنان...."
قعد ساكت وهادي وهزلو براسو...
"... هههه وشبيها تاني... قتلك الف مرة روح اعترفلها... روح اخطبها من باباها.. حاول قبل ما يخطفوهالك... هههه ولا قادر انا نخطفهالك.... ومع انا زل نهبل ومغناطيس فتيات... مش رايحة تقاوم.. ههه"
شاف معاه خزرة تخوف خلاه يبلع ريقو ويسكت...
"... مش رايح يقبل يمدهالي... مستحيل.. شكون يقبل يمد بنتو لواحد بكوش كيما انا.. "
ولا يحرك في يديه بانفعال ونرفزة... أصعب حاجة هو الحب الصعب المنال... رايح تعيش في دوامة مش راح تخرج منها
"... اه يا روميو زمانك.... روميو البكوش... علاه تحب وتدي بروحك للهلاك... هههه نتوما مهابل رايحين العذاب برجليكم.... كون كيما انا قلبي قازارنة... اه جدك... ههه لاحب لا شكوبي
لي نشوفها نعشق فيها.... منخلي لا الزرقة لا البيضة لا الحمرة...."
".... جامي رح تتبدل... مهبول وجايح.. بصح اشفا على هدرتي رايحة تجي بنت مها لي ترجعك تحت رجليها وتخليك تبكي كل دقيقة قول ما قلتهاش.... "
"... ههههه ضحكتني.. مرحبا بيها.. حاب نتمرمد شوية ههههه كرهت من مغامرات الدركي المغوار... خلي نجربو العاشق المغوار.. ههههه"
"... والله تافهة ما تضحك... "
شاف معاه مشنف وراحو يتمشاو كل واحد لدارو...
أنت تقرأ
smile [مكتملة]
Comédie#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)