#smile
الحياة كيما نقول دايما لعبة... نتا وزهرك ومكتوبك فيها... متعرفش وكتاش تقدر تتبدل حياتك بحاجة بسيطة...
دخل تميم لدار... كانت الوحدة تع الليل.. نحا سباطو بشوية بش ميديرش الحس... لقا لولاد راقدين فالصالون وكل واحد وين مرمي... عدلهم فالبونك تاعهم وراح لبيتو... حمدلله ملقاهاش مقلبة... ضرب تدويشة خفيفة وطاح غلبان على السرير...
كريم تاني.. خلص قاروه فالطريق وروح للدار لقا خوه الصغير مزال فاطن ويكونكتي.. كل مايشوف شلل خوه قدامو... قلبو يوجعو عليه وسيرتو وباباه مش مهتم...
"... أنيس مزلت مرقدتش.. ؟؟؟علاه مزلت فاطن لدرك..."
"... وووو والو جيست طار عليا الرقاد.."
قرب ليه وحضنو..
"... لازم تتلهى بالباك تاعك...حاول تجيبو بش تفرح يما في قبرها... متبعنيش انا لانو ندمت وهاني لا خدمة لا والو... نتا لازم تكون خير مني... عمرك تخلي اعاقتك تأثر عليك.... "
تبسم معاه وحضنو بعضاهم... كل واحد يواسي لوخر بطريقتو...
"... جات مرت باباك..؟؟"
".... هيه جات فلعشية وكانت تحوس عليك.."
"... متحوسش عليا... اوفف مانيش حاب نشوف خليقتها قدامي... "
"... وعلاه مقلتش لبابا انو قاعدة ديرلك هكداك... "
".. بابا فرحان معاها ومرتاح... خليه هاني.. و اصلا علابالي مش راح يأمني..."
هزلو براسو موافق لكلامو وفرش فالصالون رقد تماك... عقبو الليل يحكيو ويشاركو يومياتهم مع بعض....
يوم جديد حامل فطياتو أحداث مثيرة....فطرو كي العادة وكل واحد راح لشغلو... تميم ناض وفي بالو يروح لمركز الأيتام... بسك عيطولو البارح بش يجي ينشط معاهم....فرصة تروح وفرص تجي.... كان ناشط وفرحان... حتى سمع تليفونو يعيط وهو يدوش....
"... الو صباح الخير شكون معايا؟؟"
"... نتا تميم جبران.... ؟؟"
"... وي ختي شكون نتيا ؟؟"
".... أنا الخدامة تع البارح... حبيت نقولك انو لقاو نقص فالسرباية تع الحفلة.... اذا حاب تجي تنوب...؟؟"
قعد يخممم... سرباي ؟؟ جامي خمم يكون سرباي هههه نعبو يامات الجامعة.... قراية وفلخر يخدم سرباي في حفلة...
".... وي خويا راك معايا؟؟؟ تجي ولا نو؟؟ "
"... وي نجي قولي على قداه "
"... فلعشية نشاله.. جوايه الستة... "
"... اوكي.. نهارك زين... "
قفل التليفون وناض يسوطي فرحان وحدو.. اوه... تقول ربي شاف ليه ومدلو وش حاب.. كمل تداوش بزربة وهبط يفطر وياكل... شهيتو محلولة...استغربوا من فرحتو الزايدة اليوم..
شافت زبيدة مع مها وتشريلها بمعنى وشبيه..
هزتلهت بعينها مش عارفة...
وهما في جو الفطور سمعو الطبطيب قاوي على الباب... ناض حل الباب...
راجل طويل وعريض فرطاس... وبنيتو عضلية شوية ورجولية...بشرتو مايلة للسمورية القاوية وعينيه اسود... تقول غول أعوذ بالله.. ههههه
تميم مسكين باقي مطلع عينيه فيه من رجليه حتى راسو.. الراجل ثور تطلقو ياكلك نتا... نطق بدهشة وخوف....
"... ميلوووووو ميلود هدا نتا... ؟؟؟"
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)