#smile
..... نروحو لجيهة معاكسة لكل هاد المشاعر الصادقة... في حومة كريم... ماشية بعباية مخبية وجها تعس اذا كاين واحد يشوفها ولا يعرفها... دخلت لوحد الزنقة تجري وطلعت لأول طاج فالباطيمة...طبطبت حلتلها مرة اربعينية....لقات الغاشي قبلها... نسا بزاف من كل الأعمار.... أما يشتركو في نقطة وحدة... انهم من شركاء ابليس... وغواهم الشيطان.. يدمرو حياة الناس.. ويحاولو يآذيوهم ويشركو بربي... كاين لي جاية ترجع راجلها... ولي تسحر حبيبها... ولي تكره سلفتها... اسوء الصفات البشرية تتجسد فهاد الدار...
"... دليلة اي الداخل قوليلها سمية جات... ومسحقتك ايرجون..."
"... مزالو عندها لداخل.. سربي مياتلف ندخلك موراهم..."
"... اففف وقتك درك... هاكي وازربي لازم ندخل درك وملزامش نرجع متوخرة للدار ولا يفيقو بيا..."
سنات ربع ساعة وفي يدها ساك صغير.. كي لحقت دالتها دخلت عند السحارة.... بيت صغيرة وترعب... تحس بالرعشة.. رجلين وريسان حيوانات.... حوايج بيزار... ومرة في نص عجوزة في الستين... عينيها حول ومدايرة محرمة على شعرها... مغمضة عينيها ونطقت بصوت عالي
"... وش تحتاجي يا سمية... وش جابك عندي مرة أخرى..؟؟"
قعدت فالارض ومربعة رجليها... متنكرش انو كل ما تجي هنايا تخاف والكور تاعها يرعش اما الغاية تبرر الوسيلة...
"... اننننن انا جيتك بش تمديلي حاجة يرجع راجلي يسمع كلامي وينفدلي وش نحب..."
"... ههههههههههه هدا عقار قاوي يا سمية لفعى
.... وش تحوسي من راجلك... ولا نقولو ولد راجلك... ؟؟؟ ظهرتي عينك على البكوش يا سمية....."
... تخلعت من صوتها وولات ترجف... وين علابلها هادي بواش صاري...
"... كيفاه علابلك..؟؟؟"
"...ههههه حاجة ما تخفي على الأسياد سمية..."
"...اننن انا حابة نعرف وش راح يصرا مع ولد راجلي... رح يكون ليا... رح يحبني.. رح يلبيني ويكون كي الخاتم في صبعي.... "
السحارة ولات تخبط في روحها وراسها فلرض وعينها وساعو.. تصفق وتهدر بهدرات مش مفهومة..
".. حطي الدراهم تعرفي المخفي سمية... "
... حطتلها دراهم وذهب من ذهبها هزتو دليلة.. شافت معاه ورجعتو لحجرها... تبدل صوتها وزاد حشان ونطقت
"... يا الأسياد جيبولي اخباره... جيبولي خبار البكوش.. من البحر ولا السماء... جيبوه جيبوه.... جيبوه جيبوه...."
سمية رايحة تطلق البولة في روحها من الخوف لي جاها... شوية هكدا وضرب السكات البيت..
طلعت دليلة راسها ونطقت
".... ولد راجلك راح يكون بين يدين لالات لبنات... زين ودين... وطاعة الوالدين... رايحة تهنيه وتعيشو فرحة طويلة... أما رح يتعذب بزاف رح يذوق العذاب ....."
"... كيفاه ؟؟؟. شكون هادي.. لا هو تاعي مش لازم يتزوج..."
"... منقدرش نتحكم في مصيرو ومكتوبو سمية...فوق طاقة الأسياد.... "
".. وش راح يصرا .. ؟؟؟ شكون لي رح يتزوجها.... ؟؟ "
"... عندو صاحبو عندو وحمة في كتفو... هداك رح يكون عذابو ورح يكون مخلصو... رح يمنعو ورح يجرحو.... "
".. شكون هو دليلة انطقي... ؟؟؟ "
".. معلاباليش شكون ؟؟؟ هدا وش عندي سمية.... وهاكي عقار لراجلك... بلاك يفيدك فيه.... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)