دارت غسيل ومكياج خفيف... لبسة كلاس وغالية وهبطت تفطر معا ولادها...
"... ماما جيتي تهبلي ليوم..."
تبسمت معاه وتوفيق طلع عينيه معاها مستغرب منها اليوم...
راقبت الطابلة وشافت مع هديل لي قاعدة فالتيلفون...
"... علاه نقاطك هابطة فالمات.. ؟؟؟"
مضغت وش في فمها وشافت معاها... هديل بلعت ريقها خايفة من باباها...
"... لا ماما جيست منفهمهاش بزاف... "
"... لمشكل انو معندك حتى نقطة مليحة.. راكي نيفو هابط...."
هديل حاسة بالسخانة طالعة معاها... سيرتو انها متحبش انو واحد يطيح بيها قدام باباها.. تبسمت تبسيمة صفرة...
".. بابا هو انا صح معدلي هابط اما في التريماستر الجاي نشاله نخدم... "
".... وي بنتي... زينب خلي الطفلة ترونكيل... "
هزت عينيها معاه وتبسمت وفي قلبها ما يعلم بيه غير ربي...
"... التليفون يتنحى.. وغدوة نبدأ نروح للبروف ديالك ونشوف علاه النيفو تاعك هبط.. حبي هدي بنتي ونعرف وش خصها وش لالا.."
خنزر فيها وخلاهم ملمومين... نظرات هديل لأمها كان فيهم حقد كبير و كره... لدرك زينب معلابلهاش علاه بنتها متحملهاش وتكرها.. مع انو جامي دارتلها حاجة من قبل...
ناضت من الطابلة و خلات زينب و بهاء ياكلو..
منقدرش نقول انو زينب ام مثالية... أما واجباتها كام قامت بيهم... كأنو زينب عندها شخصيات لكل شخص تتعامل معاه في حياتها.... زوجة مكافحة و متمسكة بزواج الصالونات هدا... امرأة تتعرض للذل والعنف.. سيدة راقية متكبرة ومغرورة..... ام حنون و مراعية لبهاء ومسيطرة بالنسبة لهديل...
انو تعيش بألف شخصية حاجة صعيبة بزاف لانو العلاقات كي تتبنى على أسس مش صحيحة من لول مش رايحة تكمل... وعلاقة زينب وتوفيق من البداية...... تأسست على اساس النفاق والخداع....
طلعت عندو للبيرو في الطاج لخر... من اليوم رح تبدأ خطة الانتحار بالنسبة ليا...
"... وش كاين ؟؟ علاه الحطة هادي ونتي علابلك امبوسيبل تخرجي منا...."
"... حابة ندخل فجمعية للمحتاجين و اليتامى والمراض...."
".... ههههههه من نيتك.. ونتي في اي فئة رح يصنفوك... اليتامى ولا ضحايا العنف... ولا المرضى النفسيين..."
بقات محافظة على نفس البرود ونطقت بصوت جامد وهادي....
".. مدام نتا رئيس البلدية وح تاخذ كرسي في البرلمان... وحاب تربح الانتخابات... يعني الناس لازم يشوفو انو انت مثالي لهدا المنصب.. "
قربت ليه وقعدت فوق بيروه...
".... ومدام انا مرتك راح يسلطو عليا الضوء ورح يقولو انو مرت رئيس البلدية انسانة صالحة هههه وتتبرع للمحتاجين وناشطة انسانية وهكدا فرص الربح عندك رح تزيد من جيهة... والكوتي الأسود تاعك واحد ما راح يتولهلو ولا يبربش فيه.... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)