#smile
.... يومين وهو مخنوق في الدار... ولا كي المهبول... لبس فاست وخرج من الدار هايم معلابلوش وين رايح اصلا... حتى كريم مش فارغ شغل.... راهو مع مرتو ومقدرش يقلقهم... حس روحه وحيد ومعندو حتى واحد... كانت العشرة تع الليل يمشي في الحومة .... وعينيه يحوسو على بلاصة يقعد يتنفس فيها...
.... طموبيل جواد كي العادة تمشي من وراه وإيمان تاني... تاكل وتتفرج فيه.. مقدرتش تدير اي خطوة بش توصلو... مهما دارت خايفة انو يقابلها بالرفض... خايفة من عذاب الحب يزيد يقوى عليها...
"... جواد لقيتها لقيتها...هههههه"
... شاف معاها باستغراب ونطق...
"... ايمان بليز بلا هبال في الليل...مكفاش كل يوم مكركتني فليل...."
".... هههه متخافش انت حبس الطموبيل بعيد عليه في طريقو واقعد إسنا.... وكي يجي دير روحك تتحرش بيا... وهو راح يمنعني "
".... كيفاه ؟؟؟ ايمان سي اسماعيل مش راح يعجبو وش راكي ديري... كيفاه انا نتحرش بيك.... ؟؟؟؟ "
... دزتو وقعدت من قدام تضحك وتشوف معاه بنظرات الحماس المجنونة تاعها...
".... هههههههه متخافش مش راح نقول لجوليا... دير هكدا برك please... مش حاب تزوجني وتشوف ولادي.... خلينا نصيدو العريس مالا.... "
... عض على شاربو راح يتفلق من الغش... رايحة تخرجو من عقلو... هزلها براسو موافق...
... تميم مزال يمشي وفي يدو تليفونو... يقرأ في مساجتهم معاها ويتسم وحدو.... خلات حياتو فارغة لدرجة كبيرة.... سمع حس جاي من الجيهة خلاف... دور راسو لقا ايمان ست الحسن تبكي وجواد مسكين مشوكي فيها... زعما حاول يبعد عليها وهي تقربو ليها وتعيط وتشوف من تحت لتحت... لقات تميم يشوف معاهم مش عارف وش يدير... قرب ليهم وراح عندها...
"... مدام كشما كاين ؟؟؟"
"... هئ هئ هدا راه يتحرش بيا... تعيش عاوني..."
".. شوف امشي معندو مدخلك رآها معايا.."
"... وي اصلا تبانو خارجين مع بعضاكم هيا سلام..."
خلاها مصدومة تشوف فيه رايح َجواد يضحك من تحت لتحت... اصلا شكون الحمار لي راح يامن الحكاية هادي...
... خنزرت في جواد ضربتو بوكس وراحت تجري مورا تميم... فلتحترق الكرامة مع الجحيم....
"... موسيو موسيو إسنا تعيش... "
"... هههههه هادا نتي... شفيت عليك من ليلة البحر... سمحيلي بستك انا الغالط... كنت مشتت برك..."
.... قلبها يخبط مليار فالدقيقة... هايمة ومبهمة فيه..... رايحة تذوب من شدة الاشتعال والسخانة....
"... يزيد بوس وعري مكانش مشكل... قصدي لا عادي كنت انا تاني منهارة... "
... تبسم معاها ونطق...
"... ختي المرة الجاية البسي حاجة مغطية...بسك الرجال بزاف ويقدرو يستغلوك."
....هدرتو قاعدة غير تزيد في الحالة سوء.. الطفلة تسخايل في روحها معاه في السرير والأخ ينصح فيها.... ههههه
"... أنا جيت من لوس أنجلوس.... معنديش بزاف ومزلت موالفتش الحياة هنايا اما متخافش راح ناخد بنصيحتك.... "
"...هههههه اوكي... معرف علاه تفكريني في وحدة... عندكم نفس الملامح.... سبحان الله الشبه بيناتكم...."
... بلعت ريقها تشوف معاه... يعني يقدر يكون منساهاش.... يقدر يكون تفكر بوستهم...
"... مممم وهادي البنت مهمة في حياتك... ؟؟ "
.... تنهد من قلبو ومشا وهي لحقتو
"... صراحة مبقيتش عارف وش هو المهم في حياتي... أما هي كانت كيما اختي او نقولو صديقة حشامة بزاف.... أما في نهار باستني بجرأة مزلت مشوكي كيفاه قدرت تديرها وبيناتنا كانت هي لولة هههههه "
... لمعو عينيها تحت القمر هداك ونطقت بصوت حزين ومتألم في نفس الوقت....
".... بلاك مكانتش تعتبرك هداك الصديق.... بلاك كانت تحبك وتشوفك انت محور الكون وانت كلشي...... بلاك هي كانت تقدس روحك..... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)