#smile
ناض من كرسيه وقرب وجهو لوجها
".... علاه مرانيش قادر نأمنك.. قبل يومين وصلتك للموت... واليوم تخمي في مصلحتي وحابتني نربح الفوط... زينب لواه راكي تخططي؟؟؟"
قلصت المسافة بيناتهم وتبسمت ببراءة
"... عمري كامل وانا ساكتة ونتا تضرب فيا كشما نهار درت حاجة... علابالي انو علاقتنا مش مليحة اما تبقى راجلي توفيق... لي كنت نحبو في يوم ما.... "
بقات هدرتها في بالو وتدور من جيهة عندها الحق اما قلبو مش مهنيه... غير هو يعرف شكون زينب..... ممكن كونو جامي فهمها وجامي عرف عقليتها .... عشرة تسع سنين وهو يحاول يعرف شكون زينب... لغز ومزالت لغز... مينكرش انو تغرم بيها في وقت ما... حسها انو هي الي رح تخليه يطلع و يصعد هرم القوة والسيطرة...
هو محتاج زينب كمستشارة... لانو صلاحيتها كزوجة خلصت اما كمسيرة لحياتو او منظمتها ميقدرش يتخلى عليها... دايما كانت ملكو وتحت جناحو... و ميقدرش يتخلى عليها لانو بلا بيها رح يطيح ومخططاتو رح تفشل..
هزلها براسو موافق... خلاتو وخرجت وابتسامتها الخبيثة مزالت تزين فمها خاضعتك
اليوم..... وسيدتك غدا....
في الطرف المقابل... ناض وخرج وراسو رح يتفلق بالسطر... وصل مو لطبيبها وقعد يسنى بش يروح لدار العجزة اليوم... عندو زيارة.. كل ما يروح لهاديك البلاصة يتفكر انو الناس مبقاتش في قلوبها رحمة... الوالدين خصوصا..
كمل الكنترول وكان كلشي بيان... وصلها لطاكسي وهو طلع طول يسنى في كريم يجي معاه... مالفين يجيبو حوايج خفاف وماكلة.. كادوات يفرحَ بيهم هاد الكبار لي خانتهم الدنيا ورماتهم في بلاصة منتمنى لحتى واحد يوصلها....
تلاقاو في بلاصة قريبة ومشاو مع بعض لدار العجزة... فهاديك اللحظة نسى مشاكلو وهمومو... افكارو... ودخل بشخصية طبيب مشاعر مجنون....
وزع وش جاب عليهم والضحكة مفارقتوش.. حاسس بنوع من الرضا والفخر بروحو انو ساهم ولو بحاجة قليلة انو خلا تلك الوجوه المجعدة تضحك وتفرح وترجع لصغرها..
قعد قدام وحدة فيهم لتما دايما ساكتة ومتهدرش... وتطل من الطاقة...
"... خالتي.. ارواحي تاكلي معاهم... جبنا وحد الاكلة تشهي من يدين الوالدة....."
مشافتش معاه وبقات تتفرج فالطاقة
"... وشبيك يما ههه شكون لي راكي تسناي فيه..؟؟"
"... ليوم ولدي زاد عندو طفل ونسنى فيه يجيبهولي نشوفو..."
ملامحو مالت للحزن وسكت... ملقاش واش يهدر... كيفاه راح يواسيها...
"... نعطيك حاجة ووصلهالو كي تلقاه.. ههه علابالي تعجبو.. هادي خيطتها لحفيدي ونشاله كي يشوفها يفرح ويجي يخرجني.... "
محبش يكسر بخاطرها ودا من عندها تقاشر زورق و كبوسة تع بيبي...
"... معليش هيا تاكلي وكي نمدهالو نقلك.."
"... صح.... رايح تديهالو... اني جاية ربي يسعدك وليدي ويفرحك نشاله... "
"...نشاله نشاله هيا برك... "
خلصت الزيارة وجا خارج لقا فرملية لتما... سقساها على هاديك المرة
"... اه لالة عايشة.. صراحة.. جابها ولدها قبل خمس سنين... وعندو طفل عمرو ربع سنين.. درك وكل ما يلحق اليوم هادا لي حطها هنا تقول بنو زاد عندو طفل... صراحة تشف والله ربي يعينها نشاله... "
".. مرسي ختي.."
خرج والدموع في عينو تأثر بحمايتها ومزال مش مأمن انو كاين عباد كيما هكا...
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)