#smile
خرج وخلاها.... الغضب الألم... مشاعر بزاف فدقيقة وحدة اما مكانش حل.... حاولت قداش مرة تتهنى منو اما كاين حاجتين موقفينها.... اولا ولادها..... وثانيا حبها ليه... متستغربوش... ايه مزالت تحبو رغم عذاب سنين وضرب سنين... و خيانته ليها مزالت تكن مشاعر حب مراهقة ليه.... لي قال انو الزواج يقتل الحب.... هو اكيد معاشوش... ولا عاش غير نسخة منه لانو الحب الحقيقي جامي ينقص ولا يموت...
تكات على ظهرها وتنهدت مزالت غايبة عن الوعي... غمضت عينيها وراحت في سبات تحلم بيه انو حياتها راح تتبدل....
لاول مرة رح نتوافق انا وزينب في نقطة وهي انو صح حياتها رح تتغير 180 درجة... للأسوء ولا للأحسن...... ؟؟ هي فرضيات سيتأكد القدر من صحتها ويضع الفرضية المقنعة له.....
في الجيهة المغايرة.... كانو خلصو العرض تاعهم... كان عرض رائع بزاف....لولاد الطاقة تاعهم تبدلت... عطاهم حافز بش يواجهو السرطان.... حتى الكبار تاني كانو لتما... وعجبهم العرض وكل واحد خرج الطفل المخبي لداخل ولعب كانو جامي لعب من قبل..
كانت الستة تع العشية القاعة فرغت... وهما لازم يروحو درك...
باقي ينغز فيه ولوخر مسمطو حتى فددوا في روحو بش دور ليه وقالو بيديه وشبيك
اي حوار رح يكون بلسان كريم رح نكتبو احسن ونتوما ديرو في بالكم بنو بلغة الإشارة
"..... كريم... كريم.... اه كريم..."
"... وشبيه جدك نتا.... ؟؟"
".... رايح نطرطق... اه جدك....مم قبيل وانا حاكمها نزيد شوية نطلفها هنايا...."
"..... وشنو هادي. ؟"
"... البولة.... مانيش حامل روحي وكل ما نحب نروح للتولات يحكمني طفل يقولي رسملي.."
"... روح ومتتعطلش.... بش نلقاو طومبيل توصلنا..."
".... اوكي... "
راح يجري من ومن... ويمشي ويحبس خايف يطلقها في الكولوار... والله غير فضيحة... تيمو بجلالة قدره يبول فالكولوار تع السبيطار...
البيت لي يدخلها يلقاها معمرة... دخل من ومن... وفلخر لحق لبيت فلخر.... حمدلله لقاها فارغة واخيرا....شطح شوية في البيت فرحان ويغني على البولة... بلا ما يشوف دخل يبول والله على الراحة النفسية.... خرج مرتاح وتنهد....
في لحظة شرع عينيه وحلهم مصدوم... شاف شعر طايح على المخدة لي لتما والغطا مغطي عليها... صح غاضتو... الموت تدي اي واحد.. قعد قدامها متأثر... ويدعيلها ربي يرحمها بالرغم انو ميعرفهاش.... ومبعد تبسم وجا خارج..... سمع حس جاي من الفراش... قلبو ولا يرجف.... الميت حيا...... حاول يحل الباب بزربة.... لقاه مكودي ونتوما تعرفو البيبان والسبيطارات تع الجزاير الله يبارك.... نوعية...
مسكين راح يبكي ومع هو خواف من الحوايج هادو... القرآن كامل قرأه في الدقيقة هاديك.. نحات الغطا على وجها... وحلت عينيها لقات جون فالباب... جا في بالها انو كشما دارلها.... ولا قاسها...
ولات تعيط خايفة منه وهو ولا يعيط والدنيا ولات تعيط.... في زوج خايفين وكل واحد يعيط ومعلابالوش علاه.....
سمعو الطبا الحس جاو للجيهة هاديك... بالدزان حلوه وهو مسكين طاح فلرض..
"... وش كاين مدام انت مليحة؟؟"
"... ههههه هو كان فبيتي وانا راقدة وكان رح يقفل الباب... هئ هئ...".
دور وجهو ليها مصدوم... وهو لي في بالو ميتة ورح يدعيلها بالرحمة والمغفرة....
"... خويا والله غير سوء فهم انا دخلت للبيت بش..... بش... نغسل يديا وحسبت لمرة ميتة والله مشفتها.... سوء فهم برك... "
شاف معاه الطبيب بشك...
".... اسمع يا سي نقدر نشكي بيك نورمال على اقتحام بيت مريضة بدون إذن...."
".... خلاص خويا خليه يروح... سامحتو ومدابيك متقولش لتوفيق كي يجي.... "
"... متأكدة مدام.... ؟؟ نقدر نشكي بيه ادا حبيتي... "
"... لا اطلقو... اصلا كنت دايخة ومعلاباليش وش صرا منقدرش نظلمو..... "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)