#smile
"....كيما تحبي ونتا هيا اخرج من هنا..."
".... اسمحيلي ختي... والله مقصدت..."
"... لا معليش... مسامح"
تبسم معاها وهي عدلت خمارها وشافت معاه..حاسس بالحزن عليها ومعلابالوش علاه
جاتو هاد المرأة في شكل وحدة تتعذب وساكتة...
جا خارج ومبعد دور ليها ووسع ابتسامتو...وقال بصوت حماسي وسعيد.. ودار يدو على شكل ابتسامة عريضة...
".... Smile....لانو عندك أجمل ابتسامة شفتها.."
شافت معاه باستغراب وتبسمت بدون ما تحس
وهو خرج يجري... دايما متوخر على كريم المغبون.... لقاه قدام الباب والحالة ضلمت...
".... علابالي راك مقلق... والله ما بيدي امشي بزربة ومبعد نحكيلك وش صرا معايا...."
خنزر فيه كي العادة وركبو في الطومبيل... كل واحد روح لدارو....
جا ماشي فالحومة لقاهم برا يجريو كي المتشردين... والسليبات طايحين.. ويطارشو بالحجر..... ههههه "
"... اسمع نتا وياه علاه مروحتوش لدرك.. وينها مكم..."
"... خالو تسيم.... هئ هئ ماما حاوزتنا وضربتنا بالبشماق تاعها وقالتنا متزيدوش تدخلو للدار.... ولينا عايشين فالزنقة... "
طرشقو بالبكاء في زوج.. وهو ميت بالضحك.. السنافر الشياطين جامي يترباو... مسحلهم التراب وطلعهم سراولهم ودخلهم للدار...
".... السلام عليكم... "
باس يماه وسلم على ختو...
".... وشبيكم طالقين اللولاد برا لدرك... مزالو صغار علاه ضالي تضربي فيهم... حرام عليك زوزو ههههه"
"... مشفتش وش دارو...نسكت خير...."
خلاها وطلع لبيتو..... لقاها مقلبة فوقاني على تحتاني... والشارجور مكسر.... وراسمين فالحيط...... احبك خالو تسيم.....
ناض يعيط من لبيت اسمع صوتو وهو يسب فيهم.....
"..... وسييييييم...... رسيييييييم.... ليوم نعلقكم من 😳😳😳 "
".... ماما خالو ميحشمش خلاص قال كلمة عيب وحنا كتبنالو نحبك...."
"...هههه خالكم ميعرفش التربية نتوما ناس ملاح يا سنافر... مح محح...."
هبط يتعشا معاهم ووجهو ميتفسرش... وولاد ختو يضحكو من تحت لتحت... وهو كل دورة يخنزر فيهم...
"... تميم... "
".... وي وش كاين... ؟؟ "
".... ليلى حابة تحكي معاك.... عيطتلي لبارح وقالتلي راهي فالطلاق و حابتك تعاونها... "
".... هههه وعلاه انا محامي.. أنا مهرج مانيش قاضي هنايا."
".... يما شوفي معاه كيفاه يدير..."
"... ولدي تميم... احكي معاها الطفلة بلاك ندمت... "
".... يما... نتي لي خطبتيها وحدك... ونتي لي حبييتها... وانا ملول مكنتش قابل الزواج... وتبعتك وفلخر... قلتلك منتزوجش مهرج جايح... "
".... راهي بنت خالتك والحكاية عندها تلت سنين... "
"...تلت سنين.. عشر سنين... ملول مكنتش حابها الحمد لله.. خطبتها على جالك وهي فسخت وانا لحق ههههه كنت فرحان... ملول مكانتش عاجبتني... "
"... حاجتك ولدي..... "
"... اقعدنا باير وعس ولادي في عود تعس ولادك نتا.... مفهمتش علاه لدرك متزوجتش.. "
ضحك بالصوت عليهم.....
"... ههههه زوزو شيري... لدرك ملقيتش لي تعجبني وتقبلني كيما انا... بلا مشاكل... و متحشمش بيا.... "
".... لازم تديها جايحة وتلعب وتلون... "
".... لازم تكون مختلفة عن الناس... تكون شخصية غريبة وفي نفس الوقت مثيرة... عندها ابتسامة تخليني منحيش عينيا من عليها..... تكون... "
"... شبعتني خرشف و رومانسو.... حاسب روحك روميو وجوليت... افطن.. ".
"...نتي لي مشبعك الميلود خرشف وجلبانة.. تقول عايشين غير بش تولدو..... "
حطت يدها على خدها وتخمم..
"... شحال توحشت الميلود وكلامو الحساس و لعياط تاعو وتكسارو للطوابل... وكي يقولي زبدة تاعي.... 😍😍😍"
".... ههههههههههه زبدة... يخاه على الميلود.. "
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)