#smile
تبسم معاه وحضنو مسكين عاصرو بين يديه شعرة وتخنق...
".... نسيبي لعزيز... راك غيبتها علينا.. توحشتك وتوحشت خالتي فاطمة.. وتوحشت زوزو.."
ناض يكحكح مخنوق... بسيف بش طلقو خلاه وجهو حمر..
"... اح اح اح.. مام حنا توحشناك خويا ميلود.. تفضل مرتك وولادك ام لداخل...."
دخل ولوخر قفل الباب فرحان... مدام جا ميلود يعني راح تروح زبيدة ومدام راح تروح زبيدة راح يروحو ولادها... والدار ترجع كيما كانت... وياه على النعمة...
لقاهم سلمو عليه وزبيدة مشنفة ومحبتش خلاص تشوف معاه...
".. خالتي فطوم معليكش صحتك لباس..؟ "
".. وي ولدي والله غير الحمد الله... ونتا راك مطول الغيبة.. متجي متسقسي... حتى مرتك غضبت منك...."
دور ليها يشوف معاها باين متوحشها... وهي مش حابة تشوف خلاص معاه متجاهلتو...
"... خالتي انا جيت ندي مرتي لدارها.. هي وولادي... اكي علابلك خدمة العسكر كيفاه.. وهي ولات حساسة بزاف... "
غمزت فاطمة لولدها بش يخرجو.. وخلاوهم مع بعض يحكيو...
قدم ليها وقعد قدامها.... تبسم وفرحان.. الدار فرغت بلا بيها.... راحت ودات ريحتها وجوها معاها...
"... زوزو... زبدة تاعي... متوحشتينيش ؟؟ "
دمعو عيونها...مسحت بزربة الدموع... وشافت معاه...
"... متوحشتكش وكرهتك ومانيش حابة نرجع معاك... نتا متحبنيش.. أنا ملول مكنتش حابة نزيد لولاد اما نتا لي حبيت طفلة.. وكي سمنت ووليت هكدا... حاب تزوج عليا... هئ هئ هئ.."
".....شكون لي قالك الهدرة هادي يا مرة... أنا منقدرش نفرط في مريتي ونوارة داري وأم ولادي... والله غير نتي موسوسة برك... أنا جامي نخمم نخليك ولا نتزوج عليك... نتي لي معمرة عيني وقلبي وروحي.... "
ضحكت بحشمة مخبية تبسيمتها عليه.. متنكرش مام هي متوحشتو... أما ساعات الدلال يخلي المرة تكبر في عين الراجل ويعرف قيمتها اكتر...
"... زعما تهدر هكدا من قلبك..؟ ؟ ولا غير ترطب فالحالة... اصلا اني عرفت بنك تخوني
مكلاه تكذب.... "
"... والله ما خنتك...تسما نتيا كي تلقاي تقاشري نظاف... معناها كاين مرة خلاف غسلتهملي.... ؟؟"
دورت ليه بكرشها وطلعت حاجبها...
"... بسك نعرفك فايح وناتن يا الميلود.. لوكان منغسلش انا يوليو كي ريحة الجيفا لي تنوض الميت... وكي لقيتهم مضاف قلت بنو عندك مرة خلاف تغسلهملك... "
".. هههههه انا غسلتهم بش نعاونك.. علابالي وليتي متلحقيش مع اللولاد والحمل.. قلت نغ
نعاونك... حرام نعاون مرتي العزيزة..."
شافت معاه بشوق وحنان... يدير وش يدير يبقى راجلها و اب ولادها وتاج راسها لي حبتو وتزوجتو...
نقدرو نقولو انو زبيدة وميلود كوبل تقليدي ويمثلو لي كوبل تزوجو زواج تقليدي جامي تلاقاو من قبل وجامي تعارفو...
قبل خمس سنين.. خطبها اب ميلود لي كان صاحب باباها فالعسكر... وهما وافقو... كانت خايفة بزاف.. أما وافقت على جال العايلة..
والحمد لله كان زواج ناجح وهاني... حبو بعضاهم بعد الزواج... ورزقهم ربي باول ولد وكانو توأم....
يعني مش الضرورة لازم تكون علاقة حب قبل الزواج... لانو نص الجزاير ونص عايلاتنا كان اساس صمود واستمرار زواجهم وطولة عشرتهم هي المودة و التفاهم والاحترام قبل أي حب ولا إعجاب...
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)