#smile
... صوت الريح هو لي كان يتسمع في هاد اللحظة هاديك... كف قاوية جات على خدها خلاتها تتصدم صدمة عمرها.... كف من القدر لي يلعب بابطالنا كيما يحب ووقتما يحب... صدرها طالع هابط وتنهج بقوة... طاحت على السرير حاكمة صدرها وعينها تجمدو بالدموع..
قدامها هديل لي كانت واقفة وتبكي... وجها احمر ويدها في شعرها من قوة الضغط النفسي لي عايشتو طفلة في عمرها... شكون الظالم وشكون المظلوم...؟؟؟ انا تاني نتساءل مع انو انا كاتبة القصة وانا المتحكمة في أقدار هاد الشخصيات اما لحد الان مقدرتش نعرف وش هو احساسهم...؟؟؟ زعما لوكان جيت في بلاصتهم وش ندير؟؟؟ وينا شخصية رح نكون... زينب ؟؟ هديل؟؟ تميم؟؟ توفيق...؟؟ اقتراحات بزاف ممكن نكون مجرد مشاهدة للقصة ومعندي حتى دور فيها.... كلشي وارد وممكن....
".... شششش شكون لي قالك الهدرة هادي ؟؟"
قعدت هديل قدام رجليها وحطت راسها في على رجليها....
"... هئ هئ سمعتكم نتيا وبابا تحكيو .. أنا منكرهكش انا نكره روحي.. أنا السبة لي خلاتكم دايما تتقابدو... أنا يخي ؟؟.. كرهت روحي ماما... علابالي انا السبة لي خلاتك تكرهيني.. خاطر انا بنت حرام؟؟؟.. براء متضربيهش قد ما ضربتيني انا... هو مجاش غلطة انا لي جيت غلطة يخي... ؟؟ ماما قوليلي انا حابة نموت... "
حضنتها لصدرها وتبوس في رأسها وتبكي.. درتي درتي يا زينب وتفضحتي.. هادي سنين تعذبي في بنتك ونتي ماكيش فايقة... و تلعبي بالناس... ذنوب خالدة لي ظلمتيها خرجو فيك وفي بنتك وفي عايلتك وفي حياتك...
".....لا نتي ماكيش غلطة انت اجمل حاجة في حياتي هديل.. أنت بنتي الغالية الشاطرة الهادية.... نتي مميزة ومحبوبة.... أنت أميرة هديل... أنا جامي كرهتك.. مكانش واحد يكره بنتو هديل.... حسبتك كبرتي ومبقيتيش تسحقيني.... أنا أم فاشلة... ظلمت أغلى حاجة على قلبي...."
"... متبكيش ماما... أنا مانيش قلقانة منك.. أنا كارهة روحي... هئ هئ... "
يقولك بنو البوح تريح النفوس وتقدر تكون هي سبب في إصلاح العلاقات بيناتنا... علاقة هديل وزينب كامل قلتو انو زينب السبب فلي صرالها... صح هي غلطت في انو مخممتش انو بنتها مزالت صغيرة... بنتها راهي في بداية النضوج والاستوعاب... من خلال تجربتها عرفت انو القوة تكون بالعنف... القوة تكون بالضرب والعياط والتكسار... وهدي حاجة منطقية في حالتها.... الطفل في هاد المرحلة يستقبل كل الادراكات لي فالمحيط تاعو... وفي عمر معين يولي يطبقها...
صراحة منقدر نلوم حتى واحدة فيهم... نقدر نقولكم خطوة البوح لي صرات والاعتراف بمشاعر كل وحدة فيهم رح تخلي علاقتهم تتحسن.... وكانت اخر صورة هي عناق ام وابنة.... صورة كانت رح تكون مستحيلة فحالتهم اما صرات.... فللقدر نكات عديدة وهذه احداها واذا سألتموني سأقول انها أجمل الصور 🌹✨
أنت تقرأ
smile [مكتملة]
Humor#smile ثاني قصة ليا تكتبت بعد سواد قصة "كتمان"...ماهيش كوميدية كيما توحي البداية لكن تقدرو تعتبروها جرعة سعادة ....هي بسيطة لكنها بروح ملونة كصاحب القصة ......بقلمي أسيل الإنسان مميز في تعبيره.... يمكنه ان يعبر عن أقصى مشاعره بابتسامة .... ويدفن ج...
![smile [مكتملة]](https://img.wattpad.com/cover/354605074-64-k865804.jpg)