كان "شهاب" جالسا داخل قاعة الموسيقي الخاصة - بالكونسرفتوار - يداعب أوتار غيتاره و هو يدندن بصوته العذب:
-مالي كده حيران ؟
مش راسي علي واحدة !
جوايا مليان حنان .. يكفي 100 واحدة !!
مالي كده منحوس ؟
و حالتي مقلوبة !
و كل ما احب واحدة .. ألاقيها مخطوبة !!
الاولي كانت حنين .. حبيتها 4 سنين
مش بس طلعت عروسة .. دي مخلفة بنتين !
و التانية دي كانت رانيا .. جرحتني هي التانية آا ...
قاطعته فجأة موجات ضحك أنثوية متتابعة و صاخبة ، فإلتفت بوجه عابس ليري فتاة تقف خلفه مباشرة ..
كانت في نفس عمره تقريبا ، و كانت حسناء إلي درجة كبيرة أيضا بشعرها الطويل المتفحم الذي يتوافق مع بشرتها الناصعة و عينيها الرماديتين .. :
-انتي مين و عايزة ايه ؟؟
سألها "شهاب" بإنزعاج ، بينما إستطاعت الفتاة بعد جهد جهيد أن تهدئ من نوبة الضحك الهستيرية التي إجتاحتها ، ثم قالت برقة:
-انا اسفة اوي اني قاطعتك بالطريقة دي ، لكن الاغنية كانت ظريفة اوي .. دي بتاعتك ؟؟
و عادت تضحك بقوة من جديد ، فأحمر وجهه و هو يحدجها بغيظ حانق ..
هدأت مرة أخري بسرعة أكبر ، و تنحنحت ثم سألته بلطف باسمة:
-انت شهاب طايع الصباغ .. مش كده ؟؟
تنفس "شهاب" بشيء من العنف و أجابها بإيماءة خرساء مقتضبة و هو لا يزال يرمقها بنفس الحنق ..
تجاهلت الفتاة نظراته النارية و مضت إلي القول بجدية:
-انا هاجر كمال الطحان .. جايالك مخصوص من معهد التمثيل عشان ابلغك رسالة من دكتور حسن مختار رئيس قسم المسرح.
-خير ؟؟
سألها "شهاب" بفظاظة ، فعضت "هاجر" علي شفتها السفلي بقوة و أجابت:
-احنا هنمثل مسرحية اول الشهر الجاي علي مسرح الجامعة ، و دكتور حسن اختارك عشان تكون مغني الـ Team ( الفريق ) بتاعنا ، فبعتني انا اخد موافقة مبدئية منك .. لو موافق هو بيقولك تبقي عنده انهاردة الساعة 10 مساءً في مكتبه في المعهد هو هيكون سهران هناك مع باقي الشباب.
أومأ "شهاب" رأسه ، ثم قال واجما:
-اوكي .. انا موافق .. و هبقي اروحله انهاردة في الميعاد.
إبتسمت "هاجر" بإستحسان و إستأذنت منه بتهذيب ثم إستدارت علي عقبيها و رحلت ..
راقبها "شهاب" حتي توارت عن ناظريه ، ثم تنهد بثقل و إلتفت ليجمع حوائجه حتي يرحل بدوره ...
*******************************
قضت "رضوي" النهار كله في ساحة الركض الخاصة بذلك النادي الرياضي الشهير ..
و بينما كانت تمر بين الطرقات المتفرعة لتسلك طريق قاعة الحمام و تبديل الملابس .. شعرت بيد فولاذية تقبض علي رسغها و تسحبها إلي بقعة فارغة ساكنة خلف إحدي البنايات
أطلقت شهقة مكتومة و إستدارت لتري من الذي تجرأ عليها و فعل ذلك !
لتتسع حدقتيها برعب عندما إشتبك نظرها بنظر "أكرم" .. زوجها السابق ..
حملقت في وجهه ذعرة و فتحت فمها و كادت تصرخ ، فكتم "أكرم" صرختها مطبقا بكفه علي فمها ، ثم قال بهدوء و تصميم و هو يحاصرها بينه و بين الجدار من خلفها:
-اهدي يا رضوي .. اهدي لاني مش هسيبك المرة دي الا اما تسمعيني و نتكلم.
رفعت إليه نظرا خائفا و هي تسحب أنفاسها من أنفها بعنف ، فسألها بصوت أجش:
-لو شيلت ايدي هتصرخي ؟؟
هزت رأسها نفيا ، فرفع يده ببطء و حذر .. و بالفعل لم تصرخ كما وعدته ، لكنها صاحت بحدة متوترة:
-انت عايز مني ايه تاني ؟ بتطاردني ليه ؟ احنا مش اتطلقنا و نهينا كل اللي كان بينا ؟ .. عايز مني ايه تاني بقي ؟ .. سيبني في حالي لو سمحت و امشي ، كل اللي بينا انتهي من زمان خلاص.
و عندما لم يتزحزح من مكانه ، رفعت يديها بلا وعي إلي صدره لتدفعه عنها ..
و لكن ما أن شعرت أصابعها بعضلات صدره القاسية تحت القميص القطني الرقيق حتي أحست تيارا عنيفا يسري في أوصالها علي شكل إنتفاضة قوية ..
أنزلت يديها بسرعة بعيدا عنه ، و عادت تلتصق بالجدار و قد أحالها الرعب إلي قطعة منه ..
شعر "أكرم" بتلك المشاعر المتضاربة و العنيفة التي أيقظها بداخلها ، فإقترب منها كثيرا و قال بصوت مثير و هو يمرر أنامله علي وجهها برقة:
-انا عارف انك مش طايقاني و بتخافي مني من ساعة اللي حصل بينا قبل ما نتطلق .. بس انا عايزك تديني فرصة اتكلم معاكي .. انا بس عايز اقولك كل اللي عندي و انتي قرري.
لم تحرك "رضوي" ساكنا ، فتنهد بسأم و عاد يقول:
-شوفي .. انا عارف اني كنت ندل و واطي و مش راجل كمان .. لاني كنت بطلب طلبات ماينفعش الراجل يطلبها من مراته .. انا مش عارف انا كنت عايز اخليكي تعملي كده ازاي ! .. مش عارف ازاي كنت هرضي الوث شرفي بإيدي .. جايز ماكنتيش انتي فارقة معايا وقتها .. جايز ماكنتش بحبك .. بس يا رضوي انا اتعاقبت ، ربنا انتقملك مني و بنفس الطريقة.
و هنا نظرت إليه "رضوي" في تساؤل ، فأومأ رأسه و قد بدت علي وجهه ملامح الغضب و العنف التي تعرفها جيدا ثم تابع:
-بعد ما سيبنا بعض بكام شهر .. لاحظت ان مديرة القسم عندي في الشركة بتحاول تتقرب مني .. انا ماصدتهاش ، بالعكس اتجاوبت معاها لحد ما لاقيتها في يوم بتعرض عليا الجواز .. اتجوزنا فعلا بعد فترة قصيرة جدا .. و تخيلي اكتشفت انها بتخوني و احنا في شهر العسل ، و مع مين .. مع نفس الشخص اللي طلقتك عشان مارضتيش تطاوعيني و تخليني اسلمك لي بإيديا.
حدقت به "رضوي" مشدوهة ، فيما تابع بلهجة متهدجة:
-بعد ما طلقتها كنتي انتي اول حاجة جت في بالي .. قلت ده ذنبك و ده عقاب من ربنا .. حسيت ان القلم اتردلي في كرامتي و رجولتي.
و ضحك بمزيج من المرارة و الإستهزاء و هو يقول:
-قال يعني انا كنت راجل اوي قبل كده و عندي كرامة لما كنت عايز ابيعك و اقبض التمن.
ثم صمت قليلا ، و أضاف متوسلا وهو ينظر إلي عينيها مباشرة:
-انا طول الـ3 سنين اللي فاتوا دول و انا بغالب نفسي عشان ماوركيش وشي تاني .. ماكنتش عايز اقرب منك و الوثك تاني بإيدي الوسخة دي .. بس كل يوم كان بيعدي عليا كنت بحنلك اكتر من اللي قبله.
ثم قال بعينين أطل الصدق و الندم منهما:
-انا بحبك يا رضوي .. جايز قلتلك الكلمة دي كتير قبل كده ، لكن المرة دي بقولهالك و انا حاسسها طالعة من جوا قلبي بجد .. انا لو لفيت الدنيا كلها عمري ما هلاقي واحدة زيك اقدر أئتمنها علي شرفي و كرامتي في غيابي .. انا ضيعتك من ايدي مرة .. بس اوعدك لو ادتيني فرصة هشيلك جوا عنيا و مش هزعلك ابدا.
لم ترد ، فقط ظلت ترمقه بصمت غامض فأمسك يدها و رفعها ملاصقة لفمه و هو يغمغم بحرارة:
-قولي انك موافقة يا رضوي .. قولي انك موافقة ترجعيلي و انا اوعدك انك مش هتندمي ابدا .. صدقيني انا اتغيرت .. حتي كل الفلوس اللي عملتها دلوقتي عملتها بجهدي و عرقي .. قولي انك موافقة نرجع لبعض تاني يا رضوي .. اديني فرصة واحدة .. قوليها.
-لأ !
هتفت "رضوي" صارخة ، ثم إنتزعت نفسها بقوة منه و قالت بعينين دامعتين وصوت بحت نبرته:
-لأ مش هرجعلك .. انت عايز ترجعلي عشان تقدر تئتمني علي شرفك بس انا مش هقدر أئتمنك تاني علي نفسي ، انت عارف كويس انا كنت بحبك اد ايه و عارف بردو اني استحملتك عشان الحب ده ، و دي نقطة ضعفي اللي استغلتها فيا .. مهما كنت تزعلني كنت بتبقي واثق و متأكد اني هسامحك لو رجعت تصالحني تاني .. ده في الوقت اللي كانوا كل عيلتي رافضين ارتباطنا انا وقفت قصادهم كلهم و اتمسكت بيك لحد ما اضطروا يوافقوا ، انا بجد كنت بحبك اوي .. بس انت فعلا اللي هديت الحب ده بإيدك يوم ما سمحت للفكرة القذرة دي انها تيجي علي بالك اصلا.
و صمتت للحظات مطرقة ، ثم رفعت إليه وجهها الغارق بالدموع و قالت:
-مش هرجعلك يا اكرم .. مش هقدر ابص تاني في عنيك زي زمان .. مش هقدر اشوفك جوزي المسؤول عني و عن حمايتي .. اللي عملته معايا صعب انساه طول عمري .. انا مابقتش اشوفك غير في كوابيسي .. بقيت اخاف من منك و من لمستك ، مش هقدر اتعامل معاك بطبيعية زي الاول ، مش هينفع نرجع تاني خلاص .. انساني .. انساني و يا ريت تبعد عن طريقي و ماتخلنيش اشوفك تاني ابدا.
كاد "أكرم" يحرك لسانه الثقيل و يتكلم عله يثنيها عن رأيها فسارعت هي بالمغادرة ، إذ أولته ظهره و هرولت بعيدا عنه و هي تمسح دموعها بظهر يدها ...
*******************************
-يعني الدهب اللي اختارته معاكي عجبك ؟؟
قال "إياد" تلك العبارة متسائلا و هو يخاطب "هنا" الجالسة في المقعد المجاور لمقعد القيادة بسيارته ..
إبتسمت "هنا" إبتسامة لم تصل إلي عينيها و قالت بلهجة هادئة:
-اه .. عجبني اوي.
قطب "إياد" مستغربا ، فسألها بإهتمام و هو يهتم للطريق أمامه في الوقت ذاته:
-مالك يا هنا ؟ .. انتي مش مبسوطة و لا ايه ؟ .. يا تري في حاجة ناقصة ؟؟
تطلعت "هنا" إليه في الحال و هزت رأسها نفيا و هي تقول:
-لأ ابدا مافيش اي حاجة ناقصة و انا مبسوطة جدا علي فكرة.
و إصطبغ اللون الأحمر علي خديها فجأة ، فإبتسم "إياد" بخفة و إستوضحها و هو ينقل نظراته بينها و بين الطريق:
-اومال مالك طيب ؟ .. مسهمة كده ليه من ساعة خرجنا من بيتكوا ؟؟
ضغطت علي شفتيها بكدر ، و أجابت:
-ماما مش مخلياني عارفة اركز في حاجة خالص.
-ليه كده ؟ .. اوعي تقوليلي عشان البنت اللي حكيتولي عنها ! .. انا علي يدك كلمت عمها و طلعتله اذن بتفتيش بيت الراجل اللي اتهمه بالخطف و روحت بنفسي مع القوة لكن الموضوع طلع كفتة.
لفظ جملته الأخير بطريقة تهكمية فكاهية أضحكتها ، فإبتسم قائلا:
-اضحكي اضحكي .. ده انا من ساعتها بقيت حديث الداخلية كلها ، كانت اول طلعة خايبة اطلعها في تاريخي البوليسي كله .. بس مش مشكلة ، انا عشان عيونك ممكن اطلع المريخ لو تحبي.
أجفلت "هنا" في خجل باسمة ، و قالت برقة ناقضت طبيعتها الجلفة عادة:
-انا اسفة اني اتسببتلك في ده بس بجد و الله احنا متأكدين ان الراجل ده هو اللي خطفها.
ثم أضافت بشيء من الندم:
-انا ماكنتش بستلطف البت دي خالص .. كنت دايما بكرهها و عمري ما حبيتها لانها كانت بتشاركني في حب امي .. ماما هي اللي ربيتها من و هي طفلة صغيرة بعد ما والدتها اتوفت لكن كمان حبيتها و يوم ما اتولدت انا سميتني اسم مقارب لاسمها من كتر حبها فيها .. و رغم كل ده .. لما ماما حكيتلي اللي حصلها حسيت لاول مرة اني بكنلها شوية مشاعر اخوية جوايا .. مش عارفة ازاي بس حسيت كمان بالندم لاني كنت بعاملها وحش و لاني كنت عايزة امشيها من بيتنا لما كانت قاعدة عندنا.
كان يستمع "إياد" لحديثها برحابة صدر ، و ما أن إنتهت حتي قال بلطف:
-انتي بتحبيها اصلا يا هنا .. من اول ما كلمتيني عنها في التليفون و انا استنتجت ده .. لكن جايز حب مامتك الزيادة ليها خلاكي تحقدي عليها شوية ، بس زي ما انتي قولتي لما شوفتيها في خطر حقيقي حسيتي بالندم .. اهو الندم ده بقي هو حبك ليها ظهر فجأة زي ما اختفي فجأة ورا غيرتك منها.
علقت "هنا" علي كلماته موافقة:
-ممكن فعلا .. انا بجد نفسي ترجع سليمة و زي ماهي .. بدعيلها و الله انها ترجع منغير ما تكون مكسورة.
مد "إياد" يده و أمسك بيدها ثم شد عليها برفق و هو يقول مطمئنا:
-ماتقلقيش .. ان شاء الله هترجع قريب .. و هترجع زي ما هي.
*******************************
يتبع
