رواية زيجات مستحدثة -كاملة-

الفصل الرابع

الفصل الرابع من #زيجات_مستحدثة

بقلم #fatma_taha_sultan

_________

اذكروا الله
________

‏جميع المشاكل بداخلك سببها هو أنك تظاهرتَ بالغباء عندما فهمت، وابتسمتَ وقت الحزن، والتزمتَ الصمت وقت الكلام.

- أحمد خالد توفيق
_____

- يا نهار أسود..ده مين ابن الجزمة اللي ضربك كده يا قلب أمك.

صرخت هايدي بتلك الكلمات وهي تري الكدمات في وجه وليد ويضع عليها الثلج الذي أتت له به نبيلة، بينما كان وليد لا يتحدث ولا يتفوه بشيء نيران تغلي به فقط، لا يدري أي ذنب قد فعله حتى يغضبه الناس هكذا !!

فهتفت هايدي صائحة في وجهه حينما وجدته لا يجيب على أسئلتهم ولا يخفف من ذعرهم منذ دقائق وهو على هذا الحال من البرود والصمت:
- يا ابني ما تنطق انتَ اتخانقت مع مين ومين اللي عمل فيك كده..رد علينا انتَ اتخرست.

قالت كلماتها الأخيرة بعنف لينهض من مجلسه:
- انا عايز أنام

قال تلك الكلمات وهو يتوجه ناحية غرفته فصاحت هايدي بانفعال شديد وكادت تتبعه لولا يد والدها:
- هو احنا مش بنكلمك يا واد انتَ تصدق أنك متربتش

لم يعبأ وليد بحديثها بل أكمل سيره إلى غرفته وأغلق الباب بعنف، فهتف ناجي بنبرة خافتة وهو يوجه حديثه إلى ابنته الحمقاء وتصرفاتها وحديثها الغير عقلاني بالمرة أكثر من ابنها:
- اسكتي سيبي الواد دلوقتي..مدام مش عايز يتكلم اسكتي..مش لازم تضغطي عليه..هو لما يعوز يتكلم هيتكلم لوحده

تفوه ناجي بتلك الكلمات لتهتف نبيلة مؤكده على حديثه بعد أن التزمت الصمت في الدقائق الفائتة:
- اه ابوكي عنده حق يا هايدي..

كادت أن ترد على حديثهم وكلماتهم ليفتح وليد باب غرفته قائلا بنبرة جامدة لا تقبل النقاش:
- انا رايح بكرا اشوف ابويا..واحتمال اقعد معاه كام يوم

أغلق الباب ما أن انتهي من كلماته فصاحت هايدي بانزعاج شديد فهو سيصيبها بالجنون:
- لا ده اتجنن..ابوه مين ده.. اللي اتجوز وخلف ونسيه..ابوه مين اللي ولا بيفكر يصرف عليه وبيتصل كل فين وفين علشان يسأل عليه

- ما خلاص اسكتي..ده ابوه مهما حصل هو ابوه..سبيه يروح زي ما هو عايز..مش هتقدري تمنعيه.