ပျော်ရွှင်မှု/ေပ်ာ္ရႊင္မႈ [Myanmar translation]

Chapter (38-2) နှစ်ပတ်လည် တွေ့ဆုံပွဲ

နှစ်ပတ်လည် တွေ့ဆုံပွဲ

"ဘာ…မနက်ဖြန်ညနေ နှစ်ပတ်လည်တွေ့ဆုံပွဲလား။" လော့ရုန်က စိုးရိမ်ပြီး ပျော်ရွှင်သွားခဲ့၏။ ချန်ဟွမ်းဌာနချုပ်တွင် နှစ်ပတ်လည်တွေ့ဆုံပွဲ တက်ရောက်ရန်မှာ ရှားပါးသည့်အခွင့်အရေး ဖြစ်ပေသည်။ ထိုပွဲက လီကျောင်း၏တန်ဖိုးကို အများအပြား ထပ်တိုးစေလိမ့်မည်။ အရေးအကြီးဆုံးအရာမှာ အချိန်တစ်ရက်တည်းရသဖြင့် အသေးစိတ် ပြင်ဆင်ရန် အချိန်နည်းနည်းမှ မရှိတော့ခြင်း ဖြစ်၏။

"အစ်ကိုလော့ ၊ ချန်ဟွမ်းကနေ အကန့်အသတ်နဲ့ ထုတ်ထားတဲ့ ချန်ရှှီးနာရီတစ်လုံး ပို့လိုက်ပါတယ်။" ထိုအခမ်းအနားတွင် အနုပညာရှင်များက ချန်ဟွမ်းအမှတ်တံဆိပ်၏ပစ္စည်းတစ်ခုခုကို သေချာပေါက် ဝတ်ဆင်ရန်လိုအပ်ပေသည်။

လော့ရုန်က ချန်ဟွမ်း ပေးပို့လိုက်သည့်ဘူးကို ဂရုတစိုက် ဖွင့်လိုက်၏။ အထဲတွင် တလက်လက်တောက်ပနေသည့် စိန်နာရီတစ်လုံး ရှိနေခဲ့သည်။

"ဟစ်။" စတိုင်လစ်က ခဏကြည့်ရန် လာခဲ့ပြီး နောက်ဆုံးတွင် အသက်ပြင်းပြင်းရှုသွင်းလိုက်သည်။ "ဒါက ချန်ရှီးဌာနချုပ်မှာ ရှိပြီး နောက်ထပ် ထပ်မထုတ်တော့တဲ့ ကြယ်ပင်လယ် လို့ခေါ်တဲ့နာရီမလား။"

ထိုပစ္စည်းကို အလွန်သာမန်ကာလျှံကာပုံစံနှင့် ပို့လိုက်ပြီး သူတို့က ပစ္စည်းကာကွယ်မှုစာချုပ်တွင်တောင် လက်မှတ်ထိုးရန် မလိုအပ်ခဲ့ပေ။ အရမ်းပဟေဠိဆန်လွန်းလှပေသည်။ 

"အာမခံဆီ မြန်မြန်ပို့လိုက်။" လော့ရုန်က သူ့နှလုံးသားလေးကို သက်သာရာရအောင် အလျင်အမြန် လုပ်ရန်လိုအပ်သည်ဟု ခံစားခဲ့ရ၏။ "ငါတို့က ပစ္စည်းရဲ့လုံခြုံမှုကို သေချာအောင် လုပ်ရမယ်။"

"ချန်ဟွမ်းက ဘာကိုဆိုလိုချင်တာလဲ။" ကျန်းရှောင်ယွမ်က ထူးဆန်းသည်ဟု တွေးမိခဲ့သည်။ အကယ်၍ သူတို့က နှစ်ပတ်လည်တွေ့ဆုံပွဲသို့ လီကျောင်းကို ရိုးရိုးသားသားဖိတ်ခေါ်ချင်လျှင် ကုမ္ပဏီကို အကြောင်းကြားရန် ယနေ့အထိ စောင့်ဆိုင်းနေမည် မဟုတ်ချေ။ သို့သော် ရိုးသားမှုမရှိပါက သူတို့က ထူးခြားသောအဓိပ္ပါယ်ရှိသည့်နာရီကို မည်သို့ ပေးပို့နိုင်မည်နည်း။ သူတို့က တာဝန်ခံစာတွင် လက်မှတ်ထိုးပေးရန်ပင် မလိုအပ်ခဲ့ပါ။ သူတို့ဘက်မှ ပျောက်သွားသည်ဖြစ်စေ၊ မတော်တဆပျက်စီးသွားသည်ဖြစ်စေ၊ လှည့်စားမှုလုပ်သည်ဖြစ်စေ သူတို့တွင် တာဝန်ယူနိုင်သည့်အနေအထား မရှိပေ။