حكاية ظلام (مكتملة)

حكاية ظلام انت اختيار 01

الساعة تشير الى 6 زوالا، السماء صافية و الشميسة مازال مادة خيوطها الذهبية مخلية الجو دافئ و غزال...

خرجات من الليسي و الطابلية فايديها و على محياها ابتسامة كتفرقها فوجه كل تلميذ و تلميذة رماو لها السلام او اكتفو بهز راسهم لها، تمشات بخطوات ثقيلة حتا وصلات لطوموبيلتها و تنهدات من الاعماق قبل ما تطلع و تديماري مكسيرية للدار.....

مسافة الطريق و كانت واقفة فزنقة من زناقي الدار البيضاء الكبرى، هزات صاكها و طابليتها و نزلات داخلة للدار، و هي طالعة مع الدروج تسلت لمسامعها صوت كيفرحها بزاف، صوت كيبعث البهجة و الحيوية فقلبها فكل مرة تسمعو او تتفاجأ بوجودو ملي كترجع من الخدمة، هاد الصوت كان د ولد ختها اللي كيصطيها..... وقفات فباب الطابق حالة ايديها بجوج ليه هو اللي غير شافها جا كيجري لعندها عنقها و هزاتو بين ايديها كادور بيه و ضحكتها مزينة وجهها مخلية عينيها يتسدو...
خرجات شابة فالثلاتينات من عمرها من الكوزينة، لابسة بيجامة صيفية طويلة و جامعة شعرها بزيف حياتي وقفات عليهم

-على سلامتك الزين، جادوووو خلي طاطا ايناس تبدل حوايجها و تجي لعندنا يلاه

-ايناس بابتسامة: الله يسلمك هنودتي

حاولات مع جاد باش تحطو و مابغاش، فكل مرة يقيصو رجليه الارض يغوت و يزيد يتعلق فيها
-ايناس: وا عتقيني مابغاش يطلقني هههه

ضحكات هند بخفة و مدات لولدها ايديها و حتا بغا يجي لعندها دور وجهو لجهة ايناس برفض و زاد تعلق فيها خلاهم غير كيضحكو
-هند: هههه شوفي لك الباسل دغيا نساني

-ايناس: هههه غير حيث شافني بحوايج الخروج بغاني نخرجو..

خذاتو منها هند بزز، كيتركل و كيفركل مابغاش يطلق خالتو، خلاتهم ايناس و دخلات لبيتها بدلات حوايجها ببيجامة قطنية د الدار، جمعات شعرها بعشوائية و رجعات خرجات لعندهم لقاتو حل فمو فالطابليط اللي فكل مرة كتاخذها هند وسيلة باش تسكتو بها و تشغلو... هزاتها ليه ايناس خباتها و هي كتشوف فختها بنظرات حادة و خذاتو بين ايديها كتلعب معاه و كتنسيه فيها

-هند: غير عطيها ليه را حمقني

-ايناس: نتي عارفة باللي هاد المرض خايب ليه، لبيبي يلاه عندو عام و نص و كتعطيها ليه كيبقى حال فيها فمو و كينفاصل على العالم الخارجي باش نتي ترتاحي

-هند: اش عندها ما دير ليه گاع، عل اقل كيسكت و كيتشغل

-ايناس: هند نتي عارفة و كاديري راسك ماعارفة حتا زفتة، ما حد لبيبي مازال ما كمل 3 سنين لا التيليفون لا الطابليط لا التلفازة ماخاصو يحل فيهم فمو و حتا الا كملها مسموح ليه ياخذهم لمدة ساعة فقط، نتي ولدك مازال صغير و بزاااف محتاج لك نتي محتاج تلعبي معاه و يحس بوجودك ماشي تلوحي ليه باش يتلهى و يسكت، واش عارفة شحال من ام كتعاني مع ولدها اللي رجع عندو توحد مكتسب غير بهاد الزعتر اللي ذكرت لك؟ واش باغا تخرجي عليه و على راسك؟