ايناس ملي مالقاتش جواب منو ظنات بلي ماعمرو يعاود يهضر معاها، لاحت تيليفونها و خبات وجهها بايديها حتا بكات و شبعات عاد رجعات ركزات على خدمتها، خذاها الوقت مع التصحيح مامسوقة لا لبكا جاد برا لا لكثرة الهضرة د النسا، مافيقها من العالم اللي دخلات ليه غير صوت تيليفونها، غير هي اللي هزاتو و بانت لها سميتو وقفات و عينيها رجعو تحقنو بالدموع
-ايناس: عمر
-عمر: لاباس عليك ؟
-ايناس ماقدراتش تزيد تحبس دموعها: سمح ليا عافاك ا خويا
-عمر: دابا غير سكتي بلاما تبكي
-ايناس: ماقادراش، خاطري ضارني بزاف فكل مرة نتفكر بلي مقلق مني و غتبدل عليا
-عمر: هاديك الهضرة را قلتها فحالة غضب و صافي، انا مامقلقش و لكن ا ايناس ثقتي تهزات من جهتك، ماقادرش نتقبل شنو قلتي حيث حاس بشي حلقة مفقودة فهضرتك
-ايناس: قسما بالله الا عمري خنت ثقتك نتا و اسماعيل، داكشي اللي فكرتي فيا مكاينش، داك النهار قلتها و نعاود نقولهالك، قبل ما نخاف منك نتا و خويا راني كنخاف من الله و انا كنت برهوشة اه و مراهقة و لكن عمري فت حدودي، كنت باغا نجرب بحال البنات و صافي
-عمر: دابا نساي عليا هاد الزمر كولو، انا محتاج للوقت باش ننسى و نتقبل شنو عرفت عليك، انا مامقلقش و غير شوية د الوقت و نرجع كي كنت
-ايناس: ماشي مشكيل اللي مهم عندي هو ماتقلقش عليا
-عمر: انا ماعيطتش لك على لميساج اللي صيفطتي، كنت اصلا ناوي نهضر معاك، هداك الحمار راه تشد، ماشي نتي اول وحدة يبتزها لقاوه مكحلها مع بزاف د البنات و منهم شي جوجات اللي شكاو بيه كيفما درتي نتي زائد مرتو اللي شبعها عصى و حطات عليه شهادة طبية، هادشي كامل غيخليه يدخل يتگلاصا فالحبيبيس
-ايناس بفرحة: واش متأكد تشد؟
-عمر: متأكد
-ايناس ماقدراتش تخفي فرحتها: الله ههه الله يعطيه غبارة، انا بغيتو عمرو يخرج من داك الغار
-عمر: دابا ارتاحي من هاد الموضوع حيث عمرو يعاود يدور بساحتك، يلاه تهلاي حتا لسبت ان شاء الله
-ايناس: ان شاء الله، الله يخليك ليا
-عمر: امين....
قطعات معاه و رجعات جلسات و هي كتحمد الله و تشكرو، اكثر هم كانت هازاه انزاح و تهنات منو...
جمعات الوراق اللي سالات منهم و وقفات فشرجم بيتها و الضحكة شاقة فمها، لاول مرة من بعد دوك السنين كلهم حسات بالراحة، لاول مرة مكتحسش بصدرها مخنوق بحال شي حجرة محطوطة عليه بداية من اعترافها للطبيبة بكلشي نهاية بسجنو، كانت كتمنى من قلبها يم•وت او توقع ليه شي حاجة خايبة نيت من غير السجن و لكن حتا عقاب بحال هذا حسسها باللذة، مجرد انو البشرية غتهنا من حرية شخص بحالو كان كافي يخليها تشعر براسها ساهمات فخير كبير غينفع بزاااف د البنات كان ممكن يدير فيهم ما دار فيها و يمكن ما اكثر.............
أنت تقرأ
حكاية ظلام (مكتملة)
Romansaالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
