نهار السبت، اول وجهة كانت لايناس و علي هي دار ام ايناس، بزز باش تسنات السبت يوصل باش تجلس مع ختها و تفهم منها الخبر لي وصلها من كوثر ملي عيطات لها نهار شافت الفيديو، علي كان معول مايقول لها والو و يدير راسو ماشاف والو و لكن بنت عمتها كان لها رأي اخر و عاودات لها كلشي....
غير دخلو للدار تسلل لمسامعهم صوت كثرة الهضرة و شي مناقش مع شي و بنادم شاعل و لي كيبكيو حالتهم حالة، علي وقف فباب الطابق مابغاش يزيد يدخل حتا خرج عندو اسماعيل لي علمو بلي الدار مرونة بعائلة نسيبو، خرجات لعندو ام ايناس سلم عليها و سول فاحوالها و رجع بحالو مخلي ايناس معاهم حتا يعاود يجي ليها فالمساء.........
ايناس بدورها مابغاتش تدخل، وقفات لهم فالباب مابغاتش تزيد بخطاويها
-ايناس: فين كاينة هند؟
-ام ايناس: سادة عليها فبيتها مابغاتش تخرج
-ايناس: ديني لعندها
-ام ايناس: جداك و خالتك هنا اجي غير سلمي عليهم و سيري
-ايناس: والله ما ندخل، ما فيا لي يسمع لشي حاجة من شي واحد، حتا يمشيو هادوك و نخرج لعندهم
-اسماعيل لمو: صافي خليها على خاطرها، ديها عند هند
-ام ايناس: وا را هند مابغاتش تحل الباب، ماكتجاوبش گاع
-ايناس: اسماعيل صيفط لها ميساج قول لها انا لي بغيت ندخل غتشوفو غتحل الباب
-اسماعيل: واخا..
دار داكشي اللي قالت ليه غير جاوباتو ب "واخا" دخلاتها مها نيشان لباب البيت، حلات لهم هند بلاما تهضر و غير دخلات ايناس عاود سدات بلاما تسوق لمها لي حاولات معاها تخرج.......
جلّسات ختها على طرف السرير و جلسات حداها و فالارض كان جاد جالس كيلعب بالالعاب ديالو، للحظات قصيرة بقاو ساكتات و حتا وحدة فيهم ما قدرات تنطق، وحدة كتسمع للهضرة المخربقة د ولد ختها و لوخرى ساهية فيه و تفكيرها مشغول حتا رجعها للواقع ايد ختها لي تمدات حتا تحطات على ايديها
-ايناس: واش نتي بيخير؟
-هند بابتسامة استهزاء: بيخير بزاف
-ايناس: هادشي اللي وقع ماشي ساهل، حطيت راسي بلاصتك ماقدرتش نتقبل، انا عارفاه اش كيسوا عندك، عارفاك كتحماقي عليه باش تشوفيه شي شوفة ماشي هي هاديك صعيبة بزاف و عاد باش تجيبي ليه البوليس انا را صدمتيني
-هند: قالتها لك ماما ؟
-ايناس: لبارح فاش هضرت نسول فيها قالتها ليا
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
