بعد زوال اليوم الموالي، ايناس كانت فبيتها مع البنات لابسة قفطان فالابيض سامبل و انيق ديال التعارف، شعرها كيف ديما بوكلاتو من التحت و خلاتو مطلوق، ميكابها كان هادئ بزاف فقط ركزات على عينيها جبداتهم بايلاينر اسود مع ريسيل عطا ڤوليم لشفيراتها اما شفايفها اكتفت انها دير گلوز عطاهم لمعة و لون وردي باهت، ظفيرات ايديها و رجليها برداتهم و صبغاتهم باللون الاحمر و كملات اللوك ديالها بسنسلة رقيقة مع الخاتم اللي ديما كادير فسبابتها......
فالجانب الاخر، علي كان بدورو فبيتو واقف قدام مرايتو كيقاد فلكول د قاميجتو البيضا اللي لابس، خذا مگانتو دارها فمعصم ايديه و هز ريحتو غسل بها قبل ما يخلل شعرو بصبعان ايديه، شاف فراسو برضى و نزل لعند واليديه اللي كانو واجدين كيتسناوه غير هو، مو غير شافتو دمعو عينيها و قربات منو بالمشية ديالها الثقيلة حتا وقفات عليه
-ام علي: تبارك الله ما شاء الله على العريس ديالي، الله يحفظك ليا ا ولدي
-علي عنقها و باس على راسها: يا ربي امين ا ميمتي و يحفظك ليا حتا نتي
-اب علي: خليونا نمشيو را تعطلنا على الناس
-علي: الواليد كيفما تافقنا، تقول لهم على داكشي اللي قلت لك و نقراو الفاتحة، ماجاتش نهضر انا و نتا كاين
-اب علي: ان شاء الله خير
فتح المجال لواليديه باش يخرجو و تبعهم حتا خوه و مرتو و فالوقت اللي بغا يخرج حبساتو ابتسام اللي تسنات راجلها حتا خرج عاد نطقات
-ابتسام: وصيتي با يقولهم يخليوكم تجلسو تهضرو؟
-علي: قلتها ليه
-ابتسام: صافي، خاصكم تحطو النقط على الحروف خصوصا و انك ما باغي لا خطبة لا وقت قبل من لاكط
-علي: كوني هانية......
عند ايناس، كتمشي و تجي فبيتها و هي حاسة براسها غتسخف فاي لحظة، شادها مغص فكرشها و قلبها كيضرب بعنفوان، كلمة توتر ماغتوصفش احساسها و كل مرة تطل على راسها فالمراية تقاد شعرها و تعاود تمشي و تجي و سليمة قدامها غير حاضياها في حين كوثر و امينة كل وحدة فيهم شادة تيليفونها و صبعانهم غير كيطاپيو، راسهم ماكيهزوهش منو و مخرجين فيه عينيهم حتا نطقات هي خلاتهم يشوفو فيها
-ايناس: دابا هذا غير تعارف و حاسة بقلبي غيسكت نهار الزواج اش غيوقع ليا؟؟
كوثر شافت فامينة و رجعات خشات وجهها فاليتيلفون في حين سليمة ناضت شدات لايناس فايديها جلساتها بلاصتها
-سليمة: واش تبغي نجيب لك كاس د لما؟؟ مالكي على هاد الرجفة اللي شاداك؟؟
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
