حكاية ظلام (مكتملة)

حكاية ظلام انت اختيار 11

فمساء اليوم الموالي، دخل اسماعيل مع كريمة و خالتها و مو و خالتو لمحل د الذهب، طلب اسماعيل من الذهايبي يجبد لهم خواتم الزواج باش يختارو شنو عجبهم و داكشي اللي دار، حط لهم اخر ما كاين فعالم الخواتم غير واحد ينسيك فلاخر، كريمة عينيها رجعو كيبريو و متحمسة تجرب و تختار و حتا بغات تمد ايديها سبقاتها ام ايناس و هزات واحد كتشوف فيه
-ام ايناس: هذا زوين، شوفيه يجي معاك

الخاتم كان غليض و فيه ثلاثة الحجرات فالحاجب و الحجرة د العين كانت كبيرة و من ملامح كريمة كان باين باللي ماعاجبهاش و لكن ماقدرات تقول والو لام ايناس... خذاتو من عندها و لبساتو و دارت عند اسماعيل هازة ايديها
-كريمة: كيف جاك؟

-اسماعيل و هو كيشوف فباقي الخواتم: ماعجبنيش بزاف..

جبد واحد اخر و مدو لها، كان نسبيا حسن من الاول غير ماشي داكشي اللي باغا هي، عاود جرباتو و حيداتو رجعاتو لبلاصتو....
قلبات بعينيها حتا طاحت فواحد حمقها قبل حتا ما تلبسو، عينيها توسعو و مدات ايديها خذاتو و جرباتو، حسات براسها طاحت فعشقو خاصة و انها من عشاق الذهب غير ما عندها جهد ليه...
فرحتها و هي كتوريه لهم ماخفاتش على اسماعيل اللي تبسم ملي عرفها طاحت على الخاتم اللي يعجبها و قبل ما تكمل فرحتهم، نطقات ام ايناس و هي شادة صبع كريمة بين ايديها كدور فيه
-ام ايناس: واالو يا بنتي و تقول واش عندك الذوق، هذا رقيق بزااف و محجر غادي غير ضيعي فيه ملي تبغي تبيعيه او تبدليه گاعما يجيب لك الثمن

-كريمة: لا ا خالتي انا مغنبيعوش و مغانبدلوش

-ام ايناس ماتسوقاتش لهضرتها: ماعجبنيش، بلاتي نشوف لك شي واحد اخر

-ام معاذ: سعيدة لبنت عجبها را هي اللي غتلبسو خليه لها

هزات ام ايناس عينيها فكريمة بحال كتسولها و فنفس الوقت كتوصل لها ماتخليش كلمتي طيح للارض...
حيدات الخاتم من ايديها و تبسمات بزز و هي كتشوف فخالة اسماعيل
-كريمة: لا را خالتي عندها الحق، فالشوفة اللولة كيعجبك و لكن ملي كتلبسيه و كتولفو العين دغيا كتمليه

-ام ايناس: عروستي غتلبس على ذوقي..

اسماعيل ماكانش فاهم شنو الحرب اللي نايضة قدامو و لكن خالة كريمة كانت فاهمة مزيان شنو كتحاول ام ايناس دير و لكن فضلات تبقى ساكتة باش تكمل الخرجة على خير...

رجعات ام ايناس جبدات واحد احسن من الاول اللي اختارت و لكن ماشي بحال الخاتم اللي عجب كريمة، قيساتو هاد الاخيرة و فخاطرها تقول لهم ماعجبنيش بغيت الاول و لكن شوفات ام ايناس و الطريقة باش واقفة بينها و بين اسماعيل مامخلياهش يشوف نظراتها او لغة وجهها اللي كيبين واش هي راضية او العكس، رضات بالاختيار د عگوزتها و نطقات "عجبني" واخا هي حاسة بالعكس....