حكاية ظلام (مكتملة)

حكاية ظلام انت اختيار 36

تعاشات العشية و فالعيادة د ابتسام، كانت جالسة هاد الاخيرة و قدامها جالس علي اللي كان باين من ملامح وجهو بلي شي حاجة شاغلة بالو، مسند بكوعو على المكتب د ختو و ساهي فالفراغ قدامو مافيقاتو غير هي ملي حطات ايديها على مرفقو و نطقات
-ابتسام: علي نتا بيخير؟

-علي تنهد بابتسامة باهتة: الحمد لله بيخير

-ابتسام: كتبان مهموم، واش مازال نفس المشكل د لي ميساج؟

-علي ساط بسخط: مازااال، تقهرت والله الا تقهرت و النمرة پيخصونيل مانقدرش نبدلها على قبل هاد التخربيق و لكن را عيقو

-ابتسام: و نتا متأكد بنات؟

-علي: كاين شي راجل غيصيفط ليا دي ميساج داموغ و كتعجبني و كنبغيك؟

-ابتسام: و لكن شنو دخل ايناس فهادشي ؟ علاش كيجبدوها؟

-علي: هادشي اللي محمقني، انا متأكد بلي داكشي اللي كيقولو مامنوش و لكن شكون غيكون باغي لها الشر حتا يعمر ليا راسي عليها و يوصل ليا شي كلام عليها ما فيه ما يتشاف؟ كون تقراي شنو كيوصلني ا ابتسام

-ابتسام: شنو كيقولو لك عليها بالضبط؟

قبل ما يجاوبها علي كانت دقات عليهم السكريتيرة اللي علماتهم بلي ايناس وصلات و سولات واش تخليها تدخل، ابتسام حركات لها راسها بالايجاب و نطقات "دخليها" في حين علي تعلقو عينيه على الباب حتا دخلات منو بابتسامتها الهادئة و خجلها اللي كيبان فوجهها المورد، سلمات على ابتسام و وقفات قدامو حانية راسها للامام و نطقات "سلام" بصوت منخفض تبعاتها بابتسامة غزالة قبل ما تجلس مقابلة معاه و تهز فيه راسها ملي نطق مسولها

-علي: ايناس لاباس عليك ؟

-ايناس: الحمد لله و نتا ؟

-علي: الحمد لله..

ماكانش صعيب على ايناس انها تلاحظ ملامحو المتغيرة، كان باين بلي عندو شي حاجة مبرزطاه و لكن مازعماتش تسولو...

سولاتها ابتسام على الاحوال و دخلات فالموضوع اللي على قبلو بغات تشوفهم
-ابتسام: كنت ديجا قلت لكم بلي غادي نجلس معاكم بجوج منها نهيأكم نفسيا للزواج و منها نهضرو حتا على العلاج د ايناس، انا غنبدا بهاد الخطوة اللي ناويين عليها و بغيتكم تركزو معايا مزيان

حركو راسهم بالايجاب و ركزو معاها كيف طلبات

-ابتسام: انا عارفة مزيان هاد شعور القلق و الخوف اللي غيكون شادكم دابا و نتوما كتفكرو بلي صافي غتبداو مرحلة جديدة فحياتكم تقدرو تكونو مستعدين لها او لا و على هادشي انا بغيت نشوفكم، بغيتكم تعرفو بلي هاد المشاعر السلبية متوقع انكم تحسو بها و هي فالاصل جاية من التجارب اللي كتشوفو فمحيطكم او من المقارنات اللي كاديرو بين الناس اللي كتعرفوهوم مزوجين و كتبقاو تتساءلو واش غتكونو بحالهم واش غتقدرو تتفاهمو مع بعضياتكم واش غتقدرو تهزو المسؤولية ولا حتا نتوما غتكونو بحال فلان اللي ماقدرش عليها او بحال فلانة اللي حياتها كلها مشاكل ماقادراش تتغلب عليهم و هاد المقارنات بالضبط هما السبب الرئيسي فالمشاكل بين الازواج، اول حاجة ماتبقاوش تسمعو لتجارب الناس الاخرين و تاني حاجة الا كان عندكم شي تساؤل على الحياة الزوجية بصفة عامة توجهو لمختص اللي غيقدر يعطيكم معلومات صحيحة و فنفس الوقت غيكون مصدر موثوق...