من بعد ما دخلات جاد لمو و غسلات الماعن، نزلات كريمة عند راجلها لقاتو جالس متكي ظهرو على راس الناموسية و مغمض عينيه، شكلو شكل واحد غارق فنعاسو و لكن هي عارفة راجلها ماكيقدرش ينعس و هو جالس، الا ماكانش مرتاح فنعستو مايغرقش فيه، تمشات لعندو و جلسات حداه فالوقت لي هو حس بها و حل عينيه كيمسح على وجهو
-اسماعيل: نزلتي!
-كريمة بابتسامة هادئة: كنتي كتسناني؟
-تنهد بتعب و حط راسو على كتفها: عييت ا كريمة، حاس براسي غينفاجر، محتاج نهضر معاك
-خللات صبعانها فشعرو من مور راسو و نطقات بنبرة دافية: انا معاك، غنسمع لك
للحظات كان الصمت هو سيد المكان حتا بعد منها بلطف و رجع تنهد بتعب و هو كيحك فجبهتو
-اسماعيل: انا بغيت نفهم غير حاجة وحدة، شنو لي كيخلي شماتة يخسر استقرار دارو و حياتو و مرتو على قبل (زم على فمو ماباغيش يخسر الهضرة قدامها) انا دابا واقف فالنص، ماعارف واش نوقف معاها فداكشي لي بغات و غتكون مرتاحة فيه او ندير فيها راجل الدار كيف قالت الواليدة و نخليها قدام عيني ولا شنو خاصني ندير؟ والله ما عارف راسي من رجلي
-كريمة: واش نتا ماكاثيقش فيها؟ يعني الا مشات لمدينة خرى ماغتكونش مرتاح من جهتها؟
-اسماعيل: بالعكس كنثيق فيها كيف كنثيق فايناس حيث عارف تربيتهم، بالي مامشاش لهاد الناحية، انا ماباغيش نتخلى عليها و هي فاكثر وقت محتاجاني فيه، ملي غتمشي لتما تقدر تلجأ لاي واحد و لكن انا لي خوها غنكون بعيد، بغيتها تبقى تحت عيني غير حتا تشد فراسها، واخا كتبان دابا قوية و لكن هند لي كنعرف غتكون كتبات كتبكي و غتكون منهارة ديال بصح غير كتمثل قدامنا
-كريمة: انا عارفة و متفهمة خوفك و هادشي لي قلتي ليا دابا قولو لها هي، مافيها والو الا جلستي معاها و شرحتي لها وجهة نظرك، قول لها بلي مارافضش الفكرة فقط بغيتيها تبقى قدامك حتا تولي بيخير، نتا نيت مارافضش الفكرة ياك؟
-اسماعيل قوس شفايفو: بصراحة مارافضهاش، كتبقى بعقلها و عارفة مصلاحتها فين كاينة و انا ماغنبززش عليها تبقى فبلاصة كان فيها داك الشماتة، قبيلا راكي شفتيها كي كتهضر بحرقة و باين بلي مامرتاحاش فجلستها هنا و حتا الواليدة الله يهديها زايدة فيه.... بغيت نوقف معاها ا كريمة البنت راها وصلات لطبيبة نفسية
-كريمة: را قلت لك ا اسماعيل هادشي قولو لها هي و تفهمها باش تتفهمك، غذا ان شاء الله لقا الفرصة و جلس معاها هضرو فكلشي أخ مع ختو اكيد غترتاح و تريحها حتا هي
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
