رجعات ايناس للدار بنشاط، وجهها منور و كان باين بلي مرتاحة، دخلات لبيتها هو الاول بدلات حوايجها عاد خرجات لبيت الجلاس فين كانت مها و خالتها مع سكينة جالسات كيديرو كسكروط غير دخلات عليهم تبسمو لها من غير مها اللي قلبات عليها وجهها، ايناس سلمات عليهم و جلسات مقابلة مع مها اللي حسات بها ماشي هي هاديك
-ايناس: هند مشات؟
-ام معاذ: مشات ا بنتي، جا لها زهير قبيلة
-ايناس حركات راسها بالايجاب و شافت فمها: ماما كي داز نهارك فالليسي؟
مها ماشافتش جهتها نهائيا، دارت راسها ماسمعاتهاش و نطقات موجهة كلامها لسكينة
-ام ايناس: بنتي كولي، ولا مسدودة لك الشهية حتا نتي؟
-ايناس: ماما نتي عارفاني كنكره اللي يقطع عليا الهضرة ماتعاقبينيش بالخصام، ضربي و غوتي و ديري ما بغيتي غير ماتجاهلينيش
-ام ايناس بعصبية: حتا انا كنكره اللي ما يدير ليا خاطري و يدير ما قال ليه راسو
سكينة و مها شافو فبعضياتهم مصدومات، عاد كانت السيدة بيخير كيفاش تقلبات بهاد السرعة
-ايناس: اشمن خاطر مادرتش لك تاني؟؟
-ام ايناس: راكي عارفة علاياش كنهضر بلاما ديري راسك مافاهماش
-ام معاذ فهمات ختها: وا يهديك الله ا سعيدة واش الزواج فيه الخاطر؟
-ام ايناس: اه فيه الخاطر، شنو ذنب معاذ باش يمشي مكسور الخاطر حيث رفضاتو و كون غير كان عندها شي سبب لرفضها
-ايناس دمعات: دابا بقا فيك هو و مابقيتش فيك انا ياك، لاول مرة فحياتي كنجي للدار فرحانة و مرتاحة و ناسية هموم الدنيا و رجعتي ثقلتيني ب هم ماعنديش دخل فيه ا ماما، ماشي غنتزوج غير باش نتسمى مزوجة ولا حيث نتي عاجبك و خاصني نقبل بيه، الا كنت رافضة فكرة الزواج غير حيث مازال ما جا ولد الناس اللي نرتاح ليه انا ماشي نتوما، خالتي سمحي ليا نتي فوق راسي و عيني و عارفة شحال عزيزة عندي و عارفاك حتا حقانية، واش غير حيث هو كيبغيني نوافق عليه و فاللخر نعِيّشو فالعذاب؟؟ ماما واش مكتفكريش ففرحتي انا و فراحتي انا؟ غير قولي ليا
-ام ايناس بهدوء: هادشي كولو اللي كندير را غير باش تكوني فرحانة و مرتاحة
-ايناس: لا هادشي اللي كاديري باش نتي تكوني فرحانة و تقولي اوف تزوجات و تهنيت... نهار غتفهمي بلي كلشي بالمكتاب غترتاحي و غنرتاح حتا انا، سمحو ليا و لكن هاد الموضوع غادي يتسد هنا، معاذ بحال خويا و عمري نشوف فيه شي شوفة اخرى نهار يجي ولد الناس اللي يعجبني و نرتاح ليه ديك الساعة غتسمعو مني كلمة موافقة على الزواج واخا؟؟
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
