فالمساء و فجهة خرى و بالضبط فكازا، كانت كوثر فبيتها جالسة بحجبانها المعقودين كتشوف هاد عبد الله اللي ماوفاش بكلمتو و هادي سيمانة و الزيادة باش هضرات معاه، اه تفكات من الشارف اللي كانت غتزوج بيه و لكن فاي لحظة ممكن يجيها شي واحد اخر كفس من هاداك و الا كانت المرة اللولة فلتات من التزويجة هاد المرة مستحيل.....
عيطات لها مها من برا باش تخرج تعاونها يحطو العشا و ناضت كتأفف و مع خرجات مع جات فوجه عمر اللي غير شافها تغيرات سيفتو و دخل للصالة مكره، كون ماشي باه اللي بزز عليه يطلع ماكانش يجلس معاها فبلاصة وحدة، اربع اشهر و الزيادة و حقدو عليها عاد ماكيكبر، كلما طولات الغيبة د ايناس كلما هو كيشعل من جهتها و كيتمنى غير امتا تتزوج خلاص و تغبر من قدامو، بالنسبة ليه الحل الامثل باش ماتعاودش تمرمد ليهم راسهم فالارض هو الزواج، الا كانت محكومة و محسوبة على راجل اخر منها غيتهناو من القيل و القال اللي ولا كيتقال عليهم و منها غادي يخليوها منها لراجلها شدات معاه الطريق مزيان ماشداتهاش معاه هو عارف شنو يدير معاها......
تجمعو على داك العشا اللي الاغلبية فيهم ماقاسوهش اصلا من الشهية اللي تسدات ليهم و هي جالسة حداهم و من حالة ولادو بجوج عرف اب عمر بلي ماكانش خاصو يعيط لهم للعشا، كون جلس معاهم قبل و هضر فالموضوع اللي كان باغيهم فيه و حتا يسالي معاهم و يعيط لها ديك الساعة و لكن دابا فات الفوت و الجلسة ها هما جالسينها مجموعين، تسنى حتا تهز داك الخير من قدامهم و نطق موجه لها هضرتو هي اللي كانت معاونة مع مها
-اب عمر: ملي تحطي داكشي فالكوزينة دخلي لبيتك
-كوثر: واخا...
دارت داكشي اللي قال لها و دخلات لبيتها سدات عليها و هي حاسة براسها غتسمع شي حاجة تفرحها، ماحدو جمع عمر و بلال و بغا يهضر معاهم و هي صيفطها لبيتها اذن الموضوع فيه الزواج و من لبنى اللي ماجاتش مع راجلها فهمات بلي نوضات الصداع مع خوها حيث بغا يتزوج بها، تبسمات بخبث و جلسات قدام المراية كتمشط فشعرها و كتخيل الفعايل اللي غادير مور الزواج باش تقدر تتفك منهم و ما جات فين تنوض لبلاصتها و تخشى ففراشها حتا كانت دخلات عليها مها و من ملامح وجهها عرفات بلي داكشي اللي فبالها هو اللي كاين و لكن ماحاولاتش تبين
-ام عمر: نهار السبت ان شاء الله جايينك الخطاب، ليوم هضرو مع باباك فالتيليفون و دار معاهم السبت ان شاء الله، عارفين عليك كلشي و قابلين و غيجيو باش يتفاهمو الرجال على كلشي
قلبات عينيها و كأنها مامسوقاش لشنو سمعات او ماباغاش تبين بلي هاد المرة موافقة على هاد الزواج
-ام عمر: طلبي الله يكمل هاد الزواج ماشي بحال الاول، باك و خوتك راني غير شاداهم عليك باش ديريها فبالك
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
