حكاية ظلام (مكتملة)

حكاية ظلام الفصل الثالث 75

فعشية اليوم الموالي كانت هند و جاد مع نعمة و ولادها جارة پوسيت ناعسة فيها أروى، كيتمشاو و هاد الاخيرة خارج صوتها مع ولادها اللي كل مرة مضاربين او مفارقين عليهم و هند حداها غير مبسمة و كتحرك فراسها بلا حول

-هند: دابا هادشي اللي مازال غيبقى يدير ليا سي جاد؟ حلوقي كيخرج دابا غير فالدار عاد ملي يبدا التشيطين ديال بصح

نعمة وقفات فنص الطريق و هزات ايديها حطاتهم على راسها و هي كتغوت

-نعمة: وا ولاد الحرااااااام من فعايلكم دوزو قدامي (خنزرات فولدها الكبير) ياااااااسر اجي لهنااااااا

قرب منها ياسر مبادلها التخنزيرة و ربع ايديه كيشوف فيها

-نعمة: علاش كتضرب خوك ؟ اش دار لك

-ياسر: هو اللي ماكيسمعش ليا، قلت ليه واخا تقولي لنا نخرجو للجردة نقولو لك لا بجوجنا و لكن هو غفلني و قال ليك واخا

علات هند حواجبها و هي كتشوف الصراحة د وليد د 7 سنين، تخيلات جاد فاش غيكون قدو حتا هو و يبقى يتقابح معاها

-نعمة: و علاش بالسلامة مابغيتيش تخرج ا سي ياسر؟

-ياسر بزعل طفولي: حيث ديك المرة واعدتيني نتي و بابا غتديونا ل لافوار و درتيها بنا، نتي واقيلا نسيتي انا را ما نسيتش و مابغيتش نخرج لهاد الجردة و كون ولدك قال لك لا ماكناش غنخرجو اصلا

شافت نعمة فهند لقاتها كتضحك، هي بصح نسات بلي شي مرة واعدوهوم يخرجوهم لبارك د اللالعاب و لكن ماتوقعاتش يدير لها النقابة مع خوه اللي صغر منو بعام

-نعمة: دابا صافي خرجنا المرة الجاية نديكم

علا كتافو بزعل حقيقي و من حزنو ما حس براسو حتا بدا يبكي خلا مو تحنات لمستواه كتمسح ليه فدموعو و هند فوق راسهم كتبرد السوق

-هند: مازال الحال ا نعمة خلينا نديوهم

-نعمة: و البيبي كي غانديرو لها را غيبغيو يلعبو و غيخصني نبقى رادة معاهم البال و حتا نتي غتبغي تلعبي مع ولدك

-هند: لا لا ها نتي كتشوفي جاد مبرزط و ماعندوش الخاطر للعب، انا نبقى شادة اروى و نتي لعبي معاهم

بانت لها سكتات و كأنها بدات تقتانع و كملات
-هند: نوضي ا صاحبتي بلاما يتقلقو فعيواض ما ندوزو عشية زوينة غيدوزوها هما فالبكا

-نعمة وقفات باستسلام: واخا

-هند: دابا المشكل خلينا الطوموبيل حدا دارك، كون غير خليتيني نجيبها على اقل كنا نمشيو فيها دابا