فالكوزينة، كانت كريمة واقفة على الماعن باش دارت كاسكروط هي و ولدها و عگوزتها كتغسل فيهم و تفكيرها غير فهاد الاخيرة، كتبان مريضة و غير ساكتة و مهمومة، حاولات معاها تهضر و تقول اش عندها و لكن كلمة وحدة اللي فلسانها هي "انا بيخير"، كانت خايفة تشوف منها شي تعامل ناقص او تقمعها ملي تعلمها بلي غيرجعو معاها كيف كانو فالاول و لكن اللي بان لها كان العكس، رحبات بالفكرة و عجباتها و رضات عليها گاع و هادشي على قد ما استغربات منو كريمة على قد ما خلعها حيث معروف بنادم الخبيث مايمكنش بين ليلة و ضحاها يتبدل داكشي علاش خذات قرار واخا تشوف معاملتها المزيانة ماثيقش فيها و تنتبه منها حيث عارفة اللي قدامها ماشي شي وحدة اللي ساهلة....
على حالتها ساهية و كتفكر، دخل عليها ايوب اللي علمها بلي "بابا اسماعيل" كيفما كيسميه جا و جالس مع "جدة القبيحة" كيف مسمي عگوزتها، كملات غسيل الماعن بسرعة و التحقت بهم جلسات معاهم هما اللي كانو كيهضرو على ايناس
-ام ايناس: العشية كلها و انا كنعيط لها ماكتجاوبش
-اسماعيل: بلاتي نعيط ل علي تقدر تكون ناعسة ماسمعاتوش
-ام ايناس: ولا ماعرفاتش كيفاش تجاوب الا ماكانش حداها راجلها (شدات جهة قلبها) اااه على بنتي مسكينة و شحال من حاجة تبدلات فحياتها
-كريمة: خالتي واش قلبك ضارك؟ راك غير شاداه
-ام ايناس بتعب: بعض المرات كيتزير عليا، كتشدني بحال النغصة
-كريمة: كون غير خليتي اسماعيل يديك للطبيب را كتباني مريضة بزاف
-ام ايناس: ان شاء الله غنولي بيخير (شافت فولدها) عيط ل علي ا ولدي
-اسماعيل جبد تيليفونو: واخا..
حط التيليفون على وذنيه و غير وصلو صوت علي سول فيه و فاحوالو قبل ما يطلب منو يدوز لهم ايناس باش تهضر معاها مو و هادشي اللي كان، ام ايناس غير سمعات صوت بنتها ماقدراتش تصبر و بدات تبكي تاني خلات ايناس حتا هي تبكي و ماقطعات معاها حتا أكدات لها بلي هي بيخير و ماناقصها والو....
مدات التيليفون لولدها و هي كتمسح فدموعها
-اسماعيل: دابا علاش كاديري هاد الحالة فراسك؟ واش بغيتي توقع لك شي حاجة باش ترتاحي؟ وا لعني الشيطان الواليدة را مكتاب الله كيتصرف واش ماراضياش على قدر الله؟
-ام ايناس: ماشي لخاطري ا ولدي، راضية و حامدة الله و لكن فاش كنتفكر بلي انا السبب كنبغي نحماق
-اسماعيل بنرفزة: و شكون قال نتي السبب واش غير نتي اللي كنتي فداك الفرح؟ را ممكن تكون اي وحدة تما حاضرة ماتكونش ذكرات الله و يكون اللي وقع بسبابها و زيدون هذا كيبقى غير احتمال
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
