حكاية ظلام (مكتملة)

حكاية ظلام انت النور وسط عتمتي 59

مور العشا، فبيت الجلاس كانت جالسة ايناس مع مها و خوها و مرتو و مع كوثر اللي اصرت انها تبقى مع بنت خالها شي ايام بما انها بقات فكازا منها تعوضها على داك الوقت لي كانت خاصماتها فيه و منها تعاونها و توقف معاها فمحنتها بما انها صاحبتها المقربة، هاد القرار لي ما عجب لا ام ايناس لا كريمة و لكن رحبات بيه ايناس لي كانت موحشة بنت عمتها و بغات تتفكر معاها ايام زمان ملي كانت كتشوف و ملي كانت حياتها طبيعية....

-اسماعيل تبسم لختو و حط ايديه على كتافها معنقها جنب: احسن حاجة دار علي هي خلاك عندنا، توحشتك

-ايناس حطات راسها على صدرو: حتا انا توحشتك و توحشتكم كاملين

-ام ايناس: على قبلك درت ليوم شهادة طبية باش نجلس معاك هاد السيمانة

-ايناس: الله يحفظك ليا ا ماماتي الحب

-كريمة لكوثر: اختي غير عذبتي راسك كاينة انا و كاينة ماماها حنا فينا الكفاية نهتمو بها

-كوثر: ماكاين حتا عذاب ا ختي كريمة (قلبات عينيها) انا توحشت صاحبتي و مابغيتش نضيع هاد الفرصة لي هي فكازا و فدار ماماها

-ام ايناس من فوق قلبها: مرحبا بك ا بنتي

-كوثر: الله يكبر بك ا خالتي

-اسماعيل باس راس ختو: انا غنقول لكم تصبحو على خير، ليوم عييت و عاود غذا فايق بكري

-ايناس تحسسات وجهو بايديها و باستو فحنكو: تصبح على خير

-ام ايناس: تصبح على خير ا ولدي

خرج من البيت و تبعاتو مرتو للكوزينة في حين ايناس شافت فاتجاه الصوت د مها و نطقات باحراج

-ايناس: ماما تقدري تعاونيني ندير روتيني المسائي؟ بغيت ندخل لفراشي قبل ما يعيط علي

قبل ما تجاوب ام ايناس كانت سبقاتها كوثر
-كوثر: خالتي غير ارتاحي كتباني عيانة انا غنتكلف

-ايناس: ا لا ا صاحبتي بلاما نعذبك

-كوثر: ماكاين حتا عذاب، شفتي ما حدي هنا نتي و خالتي غترتاحو و انا غنتكلف بكلشي، انا غنهتم بك ا ايناس

-ايناس فتحات ذرعانها بفرحة: اجي نعنقك اجي، شكون بحالي عندي بنت عمتي و صاحبتي دايراني ختها
-كوثر قفزات عليها معنقاها و نطقات بهمس فوذنيها: هادشي كولو غير باش تسامحيني

-ايناس بنفس نبرتها: مسامحاك الحمقة صافي نساي لي داز

-ام ايناس ماكانتش راضية و لكن فرحة بنتها كانت حابساها تهضر: الله يرضي عليك ا بنتي