هاديك السيمانة دوزها علي ما بين خدمتو و دارو و ما بين حاجة خرى شاغلة بالو من نهار رجعات ايناس، يسالي خدمتو و يدوز نيشان للدار يوقف على الفراش حتا يشد بلاصتو عاد يتحرك لدار واليديه، على داك الحال بقا حتا لنهار الجمعة و اللي كان اخر نهار فالتفراش، فمساء داك النهار، غير تأكد ان كل حاجة شادة بلاصتها خرج شد طريقو لعندها لقاها واجدة كتسناه، سلم على مها و على اسماعيل اللي كان فالدار واقف على التجهيزات د الصدقة اللي غتكون السبت بالليل و خرجو شدو طريقهم لدارهم....
غير وصلو و قبل ما ينزلو كان صونا تيليفونو و غير شاف شكون مد لها سوارت الدار و غمزها
-علي: سبقيني انا نهضر و نتبعك
-ايناس: واخا..
خذات منو السوارت و طلعات خلاتو خرج من الطوموبيل كيجاوب اللي عيط ليه، ماحكراتش و تناسات ملي حلات الباب و تفاجآت من الفراش اللي كان مزين الدار، تخرج من هاد البيت و تدخل للبيت لاخر و هي مبهورة بذوقو و بالفراش اللي كان مخلي الدار كتعطي انطباع الهدوء و الراحة النفسية سواء بالاثاث اللي كان قليل مامشارجيش الدار او بالالوان الفاتحة اللي كتفتح النفس و كترخيها....
دخلات لبيت النعاس و خرجات للبالكون طلات عليه لقاتو مازال كيهضر بضحكة حافرة غمازاتو، ماعرفاتش علاش حاسة بلي ماباغيهاش تسمع شنو كيقول و كيبان بحال مخبي عليها شي حاجة، نفضات راسها من هاد الافكار و رجعات دخلات للبيت حيدات زيفها و طلقات شعرها و من البيت خرجات للكوزينة ناوية تهز كاس د لما تشرب حتا سمعات الباب تحل و تسد، سمحات فالما و قبل ما تخرج كان طل عليها براسو و دخل لعندها، قفزات عليه معنقاه و حتا هو خشاها فيه مفرغين الشوق د الايام اللي كان جامعهم فيهم غير التيليفون، بعدها عليه بلطف و ايديه محاوطين خصرها
-علي: كيف جاتك؟
-ايناس بابتسامة: واعرة، صرعتيها، عاد فهمت علاش ماكنتيش كتبغي توريني شنو درتي
-علي: تجي لها حسن ماتشوفيها فالتصاور (تبسم بخبث و زاد قربها ليه) شفتي بيت النعاس؟
-ايناس من نيتها: شفتو، عجبني و لكن د الرباط حسن
-علي: حتا هذا غيعجبك غير مازال ما ولفتيه، اش بان لك نخليك تولفيه دغيا؟
-ايناس ضحكات: و كيفاش غتخليني نولفو؟
ضيق شوفتو و وساعت ابتسامتو و بلاما يحتاج يهضر كانت هي فهماتو و حاولات تبعدو عليها و لكن ماخلاهاش
-علي: فين ناوية تمشي؟
-ايناس: بلاما تحاول، اصلا بغيت نهضر معاك
-خشا وجهو فعنقها كيفرق فقبلاتو: مازال الليل طويل غنهضرو فيه حتا نشبعو
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
