مور العشا، طلع هو و خوه للسطح و فايديهم لي طاس د قهوة كحلة، حطو لكراسا لي طلعو معاهم و جلسو مقابلين مع بعضياتهم كل واحد فيهم كيشرب من كاسو و ساكتين، رجع زكرياء راسو باللور و فيكسا عينيه فالسما فوقو في حين علي بقا حاضيه و كيفكر كيفاش غيبدا معاه الموضوع حتا نطق خوه و هو مازال على نفس وضعيتو
-زكرياء: قول لي فبالك بلاما تفكر جوج مرات، هاد الجلسة ديما كيكون موراها شي بلان
-علي: عندي موضوع من ديما كنبغي نهضر معاك فيه و كنقول ماشي ليوم ماشي ليوم حتا وصاني لواليد نهضر
-زكرياء تقاد فجلستو: قول مصيفطك الواليد
-علي: نجيك نيشان؟ كون ماشي هو مانجلسش معاك دابا
-زكرياء: قول ا سيدي، الله يسمعنا خير
-علي: بغيت نهضر على داك الزيار لي مزير مرتك
-زكرياء عقد حجبانو: بلاما تحاول
-علي بهدوء: لا غنحاول، ماغنقول حتا كلام د العيب نتا غير سمعني بغيتي تقتانع بهضرتي مرحبا مابغيتيش دير راسك ماسمعتي والو
ماعاودش جاوبو، سكت كيشوف فيه بمعنى "دوي"
-علي: الطريقة باش كتعامل مع مرتك ماعندهاش علاقة بالدين ا با زكرياء، الدين ديالنا مبني على المجادلة بالتي هي احسن، عندك باش تقنعها غتقنعها بالخاطر و بالحجج حتا تقتانع ماشي بالعصا و الغوات، هي ماشي بهيمة باش تضربها ا صاحبي و تفرض عليها لي مابغاتش، غتقول ليا النقاب فرض و انا من حقي نفرضو عليها غنقول لك نتا حر ما حدها وافقات عليه غير و كان ماتخنقهاش حتا فوسط دارها، من نهار ولات محسوبة عليك رجع الواليد من المحارم ديالها يعني الا دارت غير زيفها را باراكة، راجع حسابتك ا سي زكرياء و عرف الدين د بصح شنو فيه، مشاكلك ماغاديش يتحلو بالعصبية و تيقني كلما كنتي نتا ديما شاعل و كتفرض عليها بلاما تعطيها الحق تقول شنو عاجبها و شنو لي لا غتبقاو ديما فالصداع، را ماشي حرام تسمع لها و تفهمها و تكون ليِّن معاها، راك قاري سيرة الرسول صلى الله عليه وسلم زعما و عارف معاملتو مع زوجاتو كيف دايرة ماتشدش الدين بالطريقة لي بغيتي و تقول انا اخواني، ماتكرهاش فيه، تهدن و سير بالخاطر الا بغيتي توصل لشنو بغيتي و خوذها مني نصيحة عمر النسا مايمشيو بالعكس
للحظات ساد الصمت المكان، حط علي رجل على رجل كيشرب فهوتو بهدوء في حين زكرياء سهى فالفراغ و شكلو شكل واحد كيتفكر شي حاجة حتا تنهد بتعب و عاود رجع راسو للور
-زكرياء: لقيتيني غنحماق بالتفكير فهاد الموضوع نيت، من نهار رجعات من دارهم و حنا كفس من الاول عل اقل قبل ما تغضب كانت كتغوت و كتهضر على شنو ضارها اما دابا ولات غير ساكتة و زامة على فمها، تبدلات كليا و هادشي مرضني انا و فينما نهضر معاها تقول ليا مانساش العصا لي عطيتيني و معاملتك الناقصة (عاود شاف فيه بغيرة مكور ايديه) كتق•تلني فاش كتقول بلي رجعات غير على قبلك و على قبل الواليد
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
