رفض كوثر دام ليوم واحد و نهار الاحد ما جات فين ترجع ايناس و علي لدارهم حتا كانت وصلاتهم موافقتها خلات ايناس تطير بالفرحة علاش لا و هي غتعيش معاها اقرب وحدة ليها....
طبعا الاغلبية ماكانوش مرتاحين و استغرابهم من هاد الوضع كان كبير خاصة واليدين علي لي عارفين مزيان ولدهم و لكن فنفس الوقت تفهمو ايناس و قالو مع راسهم "ماشي سوقنا" لو انهم مامرتاحينش من الاول مايبغيوهاش تمشي معاهم، الاستغراب كان حتا من طرف اسماعيل و لكن ماحكرش عارف علاقة بنت عمتو بختو و دغيا تقبل فكرة انها غتمشي معاهم اما كريمة من نهار ساقت الخبار قلبها تزير عليها و حرفيا ماكانتش مرتاحة، فكل مرة تتذكر بلي كوثر غتعيش معاهم كينزل عليها الضيم و شي حاجة فالداخل ديالها كتعلمها بلي شي حاجة خايبة جاية فالطريق غير الله يستر......
كلهم فكفة و ام ايناس فكفة خرى، هضرات مع ايناس حتا عيات و غوتات و عيرات و لقات فالمقابل غير البكا و الشهيق حتا استرجعت بلي هي السبب فحالة بنتها و هي لي دارت هادشي كلو اذن مصيرها تتقبل شنو كاين، لا هي كانت مرتاحة لا هي كانت هانية و فكرة انو داكشي اللي دازت منو ممكن يتعاود حتا مع بنتها مابغاتش تخرج لها من عقلها..........
السيمانة دازت طايرة و الويكاند لاخر رجعات فيه ايناس و معاها صاحبتها لي غير طلعات للطوموبيل د علي و شمات ريحتو، تبسمات بحب و تنهدات من اعماق الاعماق بالراحة و هي كتشوف لي من زمان و هي كتسعى ليه و لي من شحال و هي كتسناه و اخيرا وصلات ليه....
الا كان غير علي عمرها نساتو و الا كان غير على الهوس رجع مضوبل من نهار عرفات بلي ايناس تعمات و هدفها من الاول هو تعيش معاهم داكشي علاش حاربات باش تعاود دير بلاصتها عند بنت خالها و تقاتلات باش ترجع الثقة د ختها و تخليهم هما لي يطلبوها تبقى معاها، عارفة بلي قدامها طريق طويل بزاف باش توصل ليه و لكن حتا حاجة ما صعيبة عليها ما حدها وصلات لهادشي كلو........
شهر 9 داز عادي جدا بلا مشاكل بلا حاجة وحدة تشكك علي فانو لي معاه كتحماق على تراب رجليه، الشهر داز و هي معاونة ايناس و كتحضيها لاتوقع لها شي حاجة، نهارهم كيدوزوه غير بجوجات فالضحك فالنعاس فالتعاويد و بالليل غير كيجي علي كتلوح كوثر حجابها على شعرها و كتكون لابسة بيجامة طويلة حتا كتعشا معاه و مع ايناس، بيناتهم فقط السلام لا هو كيهضر معاها لا هي كتنطق فقط ايناس لي كاتشاركو شنو دارت فنهارها معاها.....
مع بداية شهر 10، رجعات كوثر هي لي كادير كلشي فالدار و خلات ايناس تشد ايديها خاصة من بعد ما جرحات راسها بالموس لقاتها سبة و حلفات عليها ماتعاود دير شي حاجة و تكلفات بكلشي من حوايجهم و حوايجو هو بالضبط لماكلتو، ولات كتخلي طاتش ديالها فاي حاجة و بالرغم من محاولات ايناس باش ترجع تشقى كيف كانت فالاول الا انو كوثر فكل مرة كتبدل البلاصة د شي حاجة مولفاها ايناس حتا الا ماجات الماكلة خايبة كتجيبها هي فراسها و كتعاود تحلف عليها ماتقرب لوالو و ما جا فين يدخل شهر 11 حتا رجعات ايناس بحال الضيفة و كوثر هي مولات الدار.........
أنت تقرأ
حكاية ظلام (مكتملة)
Romanceالقصة كتعالج موضوع الارملة و معاناتها مع ام زوجها اللي كانت رافضاها، كتعالج موضوع العلاقات السامة و كيفاش اثرات علاقة سابقة على نفسية البطلة لدرجة تعقدات من الرجال و من الزواج، كتعالج موضوع الخيانة و الغذر كيفاش زوجة داتها غير فدارها و فالطلامط و ال...
